सामसुङले ग्यालेक्सी नोट सेरिजका फोन उत्पादन बन्द नगर्ने

सोल – दक्षिण कोरियाली मोबाइल फोन उत्पादक कम्पनि सामसुङले आफ्ना नोट सेरिजका फोन उत्पादन बन्द गर्ने बारे आएका हल्लामा सत्यता नभएको बताएको छ । हाल प्रिमियम फोनहरुको माग प्रसस्तै भएता पनि नोट सेरिजका फोन बन्द नगर्ने जानकारि कम्पनिले दिएको हो ।

ग्यालेक्सी जेड तथा एस सेरिजका फोनहरुको बजार बिस्तार राम्रो रहेता पनि उक्त फोनलाई कम्पनिले तत्काल बन्द गर्ने मनस्थिति नबनाएको स्पष्ट पारेको छ । फ्ल्यागसिप फोनले बजारमा राम्रो प्रभाव पारिरहेका बेला कम्पनिले नोट सेरिजका फोनहरुलाई बेवास्ता गरेको हुनसक्ने शंका कतिपयले गरेका थिए ।

कम्पनिले आगामी बर्षबाट उक्त श्रेणीका फोनहरुको उत्पादनलाई निरन्तरता दिने समेत बताएको छ । सामसुङका मोवाइल विभाग प्रमुख रो ताई मुनका अनुसार अब आउने नोट तथा एस सेरिजका फोनहरुमा एस पेन स्टाइलस फिचर समेत समावेश गरिने छ ।

यसै बीच कम्पनिले आफ्नो नयाँ मोडलको स्मार्टफोन ग्यालेक्सी एस २१ आगामी जनावरीमा सार्वजनिक गर्ने तयारी गरेको छ । उक्त फोनबारे यथेष्ट जानकारी नआएता पनि उक्त फोनले यस अघिका एस सेरिजका फोनहरुको बिकल्प बन्न सक्ने जानकारहरुले बताएका छन् ।