दक्षिण कोरियाले आप्रवासी कामदार प्रवेश नियमलाई सहज बनाउने

सोल – दक्षिण कोरियाले आप्रवासी कामदारहरुका लागि तयार गरेको योग्यतामा केही सुधार गर्दै उनीहरुको सहज प्रवेश तथा काम गर्ने वातावरण मिलाउने भएको छ । श्रम तथा रोजगार मन्त्रालयले मंगलबार बताए अनुसार दक्षिण कोरियाली संसदले सो सम्बन्धि बिधेयक पारित गरिसकेको छ ।

हाल विध्यमान नियम अनुसार इपिएस भाषा परिक्षा पार गरेपछि बिदेशी कामदारहरुले ३ बर्षको भिसा प्राप्त गर्दछन् । उक्त भिसालाई म्याद थप गरि थप १ बर्ष १० महिनासम्म काम गर्न पाउदछन् । त्यसपछि भने उनीहरुले अनिवार्य रुपमा दक्षिण कोरिया छाड्नु पर्ने हुन्छ ।

एउटै कम्पनिमा निरन्तर काम गरेका कामदारहरुले ३ महिना पश्चात एक परिक्षामा सहभागी भई सफल भएमा पुनः दक्षिण कोरिया प्रवेश गर्न पाउने ब्यवस्था रहेको थियो । हालै संशोधन गरिएको ब्यवस्था अनुसार भने १ महिना पश्चात नै उनीहरुले उक्त परिक्षामा सहभागी भई दक्षिण कोरिया प्रवेश गर्न सक्ने छन् । यो ब्यवस्था यौटै कम्पनि भित्र अन्यत्र काम गर्नेहरुका हकमा समेत लागु हुने छ ।

हालै परिवर्तन गरिएको नियम अनुसार रोजगारदाताले यौन हिंसा लगायतका हिंसा गरेका कारण कम्पनि परिवर्तन गर्नु परेकाहरुले समेत उक्त सुविधा उपयोग गर्न सक्ने बताइएको छ । करिव ५ बर्ष परदेश बसेकाहरुलाई एक महिनाको अवधि छोटो हुने भएता पनि काम गर्नेहरुलाई सहुलियत होस् भनेर उक्त नियम ल्याइएको सरकारी अधिकारीहरुले बताएका छन् ।