दक्षिण कोरियामा पर्यटक भ्रमण ३२ बर्ष यताकै न्युन

सोल – दक्षिण कोरियामा समुद्रपारबाट भ्रमण गर्न आउने पर्यटकहरुको संख्यामा ठूलो गिरावट आएको छ । तथ्याङ्कका अनुसार यस बर्ष दक्षिण कोरिया भ्रमण गर्ने बिदेशीहरुको संख्या ३२ बर्ष यताकै न्युन रहेको छ । उक्त तथ्याङ्कले कोरियाको मात्र नभई सिङ्गो विश्वकै पर्यटन नै प्यारालाइज्ड भएको समेत बताएको छ ।

यस बर्षको जनावरीबाट अक्टोबर सम्म २३ लाख ९० हजार बिदेशीहरुले दक्षिण कोरिया भ्रमण गरेका छन् । यो संख्या गत बर्षको सोही अवधिको तुलनामा ८३.६ प्रतिशतले कम भएको पर्यटन मन्त्रालयले बताएको छ ।

हाल औषतमा मासिक करिव ६० हजार जनाले मात्र कोरियाको भ्रमण गरेको बताउदै मन्त्रालयले उक्त संख्या अत्यन्तै न्युन रहेको बताएको छ । यदि सोहि संख्यालाई आधार मान्ने हो भने यस बर्षभरिमा दक्षिण कोरिया भ्रमण गर्नेहरुको संख्या करिब २५ लाख पुग्ने छ जुन सन् १९८८ को २३ लाख पछिकै न्युन संख्या हो ।

त्यसै गरि दक्षिण कोरियाबाट बाहिर भ्रमण गर्न जाने नागरिकहरुको संख्यामा समेत ठूलो गिरावट आएको छ । जनावरी बाट अक्टोबर सम्ममा जम्मा ४१ लाख २० हजार जना बिदेश भ्रमणमा निस्केका छन् जुन गत बर्षको तुलनामा ८३ प्रतिशतले कम हो । उक्त दर समेत सन् १९९८ पछिकै कम भएको समेत बताइएको छ ।