दक्षिण कोरियामा कोरोना भाइरस संक्रमण हालसम्मकै उच्च, कडा सामाजिक दुरी नियम ल्याइने

सोल – दक्षिण कोरियामा एकैदिन पाइएको कोरोना भाइरस संक्रमण हालसम्मकै उच्च भएको छ । आइतबार १०३० जना कोरोना संक्रमित थपिएसँगै एकैदिनमा पाइएको सबैभन्दा उच्च संक्रमणको नयाँ रेकर्ड कायम भएको हो ।

शनिबार ९५० रहेको उक्त संख्या एकै दिनमा हजार बढी भएको हो । उक्त संख्या मध्ये १००२ जना देशभित्रकै संक्रमित रहेका छन् भने बाँकी २८ जना भने बिदेशबाट आएका छन् । आइतबार थपिएको उक्त संख्यासँगै दक्षिण कोरियामा कोरोना संक्रमितहरुको जम्मा संख्या ४२,७६६ पुगेको छ ।

हालैका दिनहरुमा मानिसहरुको ब्यक्तिगत भीडभाड तथा जमघट बढ्न थालेको, अस्पताल, चर्च तथा अन्य क्षेत्रमा सामाजिक दुरी नियम ठीकसँग पालन नभएको लगायतका कारणले संक्रमण बढ्दै गएको स्वास्थ्य अधिकारीहरुले बताएका छन् ।

संक्रमण बढ्न थालेसँगै स्वास्थ्य अधिकारिहरुले २.५ तहको सामाजिक दुरि नियम गत हप्ता मात्र लागु गराएका थिए । दक्षिण कोरियामा संक्रमणको स्थिति हेरेर ५ तह सम्मको सामाजिक दुरी नियम बनाइएको छ । उक्त दुरी नियमका बावजुत पनि कोरोना भाइरस नियन्त्रण बाहिर गएपछि स्वास्थ्य अधिकारीहरु थप छलफलमा जुटेका छन् ।

यसै बीच राष्ट्रपति मुन जाइ इनले कोरोना रोकथामका लागि सबै उपाप अपनाउन सम्बन्धित क्षेत्रलाई निर्देशन दिएका छन् । तेश्रो तहको सामाजिक दुरी देखि लिएर लकडाउन सम्मको अवलम्बन गर्न उनले सम्बन्धित निकायलाई निर्देशन दिएका हुन् । उनले आकस्मिक अवस्था घोषणा गर्दै सोही अनुरुप काम गर्न समेत भनेका छन् ।

दक्षिण कोरियाली प्रधानमन्त्री चुङ साई क्युनले समेत सम्पुर्ण नागरिकलाई सकेसम्म घर बाहिर ननिस्कन अनुरोध गरेका छन् । उनले १० जना बढीको जमघटलाई पुर्ण रुपमा बन्द गर्न निर्देशन समेत दिएका छन् ।