कोरोना नियन्त्रण नियम अटेर गर्ने एक उत्तर कोरियाली नागरिकको गोली हानी हत्या

सोल – उत्तर कोरियामा कोरोना भाइरसबाट जोगिन लागू गरिएका नियम नमानेको भन्दै एक जनालाई गोली प्राहार गरि हत्या गरिएको छ । चिनियाँ सीमामा तस्करी गरेको आरोपमा उनलाई गत नोभेम्बर २८ तारिखमा गोली प्राहार गरिएको रेडियो फ्री एसियाले जनाएको छ।

गोली हानेर मारिएका  पुरूष अन्दाजी ५० वर्षका हुन्। उनीमाथि सीमा पारीका चिनियाँहरूसँग मिलेर तस्करी गरेको आरोप थियो।  नागरिकले कोरोनाभाइरसबाट जोगिन अनिवार्य पालना गर्न पर्ने नियमको पालना गरून् भन्ने उद्देश्यले तर्साउनका लागि सार्वजनिक रूपमै उनलाई गोली हानी मारिएको समाचारमा उल्लेख गरिएको छ।

उत्तर कोरियाले अहिलेसम्म  कोरोनाभाइरसका संक्रमित नभेटिएको दाबी गर्दै आएको छ।

तस्करहरूले उत्तर कोरियामा भाइरस भित्र्याउने डरले किम जोङ उनले सीमा क्षेत्रमा सैनिक गस्ती बढाएका छन् ।सैनिकहरू आफैँ नै तस्करीमा नलागून् भनेर पोङ्गयाङबाट विशेष टोली पनि खटाइएको छ।

उनले भाइरसबाट जोगिन पोङ्गयाङमा लकडाउन गरेको र समुन्द्रमा माछा मार्नसमेत प्रतिबन्ध लगाएको दक्षिण कोरियाको गुप्तचर एजेन्सीले गत हप्ता बताएको थियो । एजेन्सीका अनुसार गत अगष्टमा पोङ्गयाङकै एक अधिकारीलाई विदेशबाट सामान ल्याएको भन्दै मारिएको थियो।

उत्तर कोरियाका शासक किम जोङ उनले कोरोनाबाट जोगिन अल्ट्रा हाइ लेभल इमर्जेन्सी क्वारेन्टिनका उपाय अपनाएका छन्। चीनसँगको सीमामा आवातजावत गर्न खोज्नेलाई उनले गोली हान्न आदेश दिएको बताइएको छ ।