दक्षिण कोरियामा कोरोना भाइरस संक्रमण ९ महिना यताकै उच्च

सोल – दक्षिण कोरियामा कोरोना भाइरस संक्रकण दर विगत ९ महिना यताकै उच्च भएको छ । हाल दैनिक ६०० बढी संक्रमित थपिन थालेसँगै संक्रमितहरुको संख्या समेत ह्वात्तै बढ्न थालेको दक्षिण कोरियाली रोग तथा प्रकोप नियन्त्रण केन्द्र (केसिडिसि) ले बताएको छ । केन्द्रले आगामी दिनमा संक्रमण दर अझ बढ्न सक्ने चेतावनी समेत दिएको छ ।

हालसम्म दक्षिण कोरियामा ३६३३२ जना कोरोना भाइरसका सक्रिय संक्रमितहरु फेला परेको बताउदै केन्द्रले कोरोना भाइरसकै कारण ५३६ जनाले ज्यान समेत गुमाएको बताएको छ । आधा दक्षिण कोरियालीको बसोबास रहेको राजधानी सोल क्षेत्रमा संक्रमण उच्च पाइएका कारण खतरा झन् बढेको केन्द्रले बताएको छ ।

संक्रमण बढेसँगै ठूलो स्वास्थ्य समस्या आउन सक्ने खतरा तर्फ संकेत गर्दै प्रधानमन्त्री चुङ साई क्युनले यो हप्ता परिस्थितिको मुल्याङ्कन गर्दै आगामी दिनमा सामाजिक दुरी तथा अन्य नियमहरुमा परिमार्जन सहित लागु गरिने बताएका छन् । १० दिन अघि मात्र सरकारले दोश्रो तहको सामाजिक दुरी नियम लागु गरेको थियो ।

हाल दक्षिण कोरियामा कोरोना भाइरस संक्रमणका कारण सिकिस्त बिरामी रहेका मानिसहरुको संख्या ११६ रहेको छ भने २८,६६१ जना उपचार पश्चात घर समेत फर्किसकेका छन् ।