दक्षिण कोरिया सरकारद्वारा आष्ट्राजेनेकासँग कोरोना विरुद्धको खोपका लागि सहमति पत्रमा हस्ताक्षर

सोल – दक्षिण कोरियाली सरकारले कोरोना विरुद्धको खोप निर्माता कम्पनि आष्ट्राजेनेकासँग खोप खरिदका लागि सहमति पत्रमा हस्ताक्षर गरेको छ । श्रोतका अनुसार सरकारले उक्त कम्पनिसँग कोरोना भाइरस विरुद्धका करिव २ करोड ५० लाख डोज खोप खरिद खरिद गर्ने सम्झौता गरेको छ । एसके बायोसाइन्सको समन्वयमा आन्तरिक प्रयोजनका लागि AZD1222 नामबाट उक्त खोप उत्पादन गरिने छ ।

देशमा आवश्यक पर्ने खोप खरिद गर्ने गरि सरकारले प्रकृया अगाडी बढाएको बताउदै सरकारी अधिकारीले थप छलफल र गृहकार्य पश्चात केही समयमा उक्तबारे जानकारी दिने बताएका छन् । रकमबारे मौन रहेको उक्त श्रोतले थाइल्याण्ड र फिलिपिन्स सरकारकै हाराहारीमा दक्षिण कोरियाले खोपमा खर्च गर्न लागेको बताएको छ ।

हालै थाइल्याण्ड सरकारले २ करोड ६० लाख डोज खोपका लागि आष्ट्राजेनेका सँग २०० मिलियन डलरको औषधि खरिद सम्झौता गरेको छ । फिलिपिन्सले पनि करिव २६ लाख डोज खोप आष्ट्राजेनेकासँगै खरिद गर्ने सम्झौता गरेको छ ।

हाल सरकारले भ्याक्सिनको मुल्य, भण्डारण तथा वितरणको व्यवस्थापनका लागि काम गरिरहेको बताउदै यथाशिघ्र उक्त भ्याक्सिन जनतामाझ ल्याउने सरकारी अधिकारीले बताएका छन् । एसके बायोसाइन्सले उक्त औषधि आन्तरिक तथा बाह्य प्रयोगका लागि आष्ट्राजेनेकासँग सहकार्य गर्दै उत्पादन गर्ने समेत श्रोतले बताएको छ ।