उत्तर कोरिया ‘कोरोना भाइरस पर्खाल ‘ बनाउदै

सोल – उत्तर कोरियाले आफ्नो देशमा कोरोना भाइरसको संक्रमणलाई रोक्नका लागि उत्तर दक्षिण सिमा क्षेत्रमा पर्खाल बनाउन सुरु गरेको छ । देशमा भाइरस युक्त मानिसहरुको प्रवेशलाई निरुत्साहित गर्नका लागि उक्त पर्खाल लगाइएको उत्तर कोरियाली सरकारी सञ्चार माध्यम केसिएनएले बताएको छ ।

केसिएनएले जनाए अनुसार उक्त पर्खाल निर्माणका लागि हरेक नागरिकलाई अनिवार्य श्रमदान गर्न निर्देशन दिइएको छ । हालको विसम परिस्थितिमा यथाशिघ्र उक्त काम सक्न समेत निर्देशन दिइएको केसिएनएले संप्रेशण गरेको समाचारमा बताइएको छ ।

उत्तर दक्षिण सीमाक्षेत्रमा बनाइएको डिमिलिटराइज क्षेत्रको कडा सुरक्षा आफैमा नागरिकहरुको गैरकानुनी आवतजावत बन्द गराउन काफी भएता पनि उत्तर कोरियाले किन त्यो पर्खाल निर्माण सुरु गर्यो भन्नेबारे यकिन जानकारी हालसम्म नआएको अधिकारीहरु बताउदछन् । यो उत्तर कोरियाको नयाँ प्रोपोगाण्डा हुनसक्ने अधिकारिहरु बताउदछन् ।

गत महिना एक उत्तर कोरियाली नागरिक दक्षिण कोरिया पुगेका थिए भने एक जनालाई दक्षिण कोरियाली सेनाले गोली हानी मारेका थिए । उत्तरको हालको रणनिति त्यस किसिमका स-साना चुहावट हुने स्थानमा समेत नियन्त्रण गर्दै बैदेशिक सिमा क्षेत्रमा पुर्ण सुरक्षा सुनिश्चित गर्नु रहेको हुनसक्ने अधिकारीहरुले बताएका छन् ।