दक्षिण कोरियाली शहर बुसानको एक अपार्टमेन्टमा भीषण आगलागी, एकको मृत्यु, २३ जना घाइते

सोल – दक्षिण कोरियाली शहर बुसान स्थित एक अपार्टमेन्टमा मंगलबार भीषण आगलागी भएको छ । आगलागीमा परि एक जनाको घटनास्थलमा नै मृत्यु भएको छ भने अन्य २३ जना घाइते भएका छन् ।

२४ तल्ले अपार्टमेन्टको १२ औँ तल्लामा बिहान ६ः१५ बजे आसपासमा उक्त आगलागी भएको थियो । उक्त घटनामा परि अन्दाजी ४० बर्षिय एक पुरुष आफ्नै कोठामा मृत फेला परेका थिए । घाइते २३ जनालाई उपचारार्थ अस्पताल लगिएको अग्नि नियन्त्रण विभागले बताएको छ ।

मृतकका छोरा पनि मृतकसँगै सुतिरहेका भएता पनि धुँवाको मुस्लो देखेपछि उठेर भागेका थिए । १३ औँ तल्लामा बस्ने मानिसहरुले खबर गरेपश्चात अग्नि नियन्त्रक त्यहाँ पुगेका थिए । आगलागी करिव ४० मिनेटमा नियन्त्रणमा आएको थियो ।

सन् १९९५ मा निर्माण गरिएको उक्त अपार्टमेन्टमा आगो नियन्त्रणका लागि कुनै पनि सुरक्षा सामाग्री नराखिएको प्रहरीले बताएको छ । हाल प्रहरी तथा अग्नि नियन्त्रकहरु आगलागिको कारणबारे अनुसन्धान गरिरहेका छन् ।