दक्षिण कोरिया तथा अमेरिका अन्तरिक्ष सैन्य क्षमता बिस्तारमा सहकार्य गर्न सहमत

सोल – दक्षिण कोरियाली वायुसेना प्रमुख जनरल ली स्योङ योङ तथा अमेरिकी अन्तरिक्ष सैन्य विभाग प्रमुख जोन रेमण्डले पहिलो पल्ट द्वीपक्षीय भेटवार्ता गरेका छन् । भेटका क्रममा उनीहरुले हाल अन्तरिक्षबाट हुन सक्ने सम्भावित खतराबाट बच्न सहकार्य गर्ने बिषयमा छलफल गरेका छन् ।

हवाईमा भएको उक्त छलफलका क्रममा जनरल लीले दक्षिण कोरियाली हवाइसेना तथा अमेरिकी अन्तरिक्ष सेनाका बीचमा सुचना तथा प्रविधिको आदानप्रदानलाई चुस्त बनाई थप प्रभावकारी रुपमा अगाडी बढाउन प्रस्ताव गरेका छन् । लीले हाल अमेरिकी अन्तरिक्ष सेनामा अध्ययनका लागि गएका दक्षिण कोरियाली हवाइसेनाको संख्या थप गर्न समेत अनुरोध गरेका छन् ।

जवाफमा अमेरिकी अन्तरिक्ष सेना प्रमुख रेमण्डले आवश्यकता अनुरुप दुई देश बीचको सहकार्य र सहयोगलाई परिस्कृत ढङ्गले अगाडी बढाइने बताएका छन् । आगामी दिनमा चुनौतिपुर्ण क्षेत्रको अन्तरिक्ष अनुगमन गर्दै सुचना आदानप्रदान गरिने समेत उनले बताएका छन् ।

लीको ५ दिने अमेरिकी प्रशान्त वायुसेनाको भ्रमणका क्रममा उक्त छलफल भएको हो । भ्रमणका क्रममा लीले अमेरिकी वायुसेनाका उच्च सैनिक अधिकारीहरुसँग समेत भेटघाट गरेका थिए ।