उत्तर कोरियाद्वारा दक्षिण कोरियाली खोप निर्माता कम्पनि ह्याक प्रयास

सोल   –  उत्तर कोरियाली ह्याकरहरुको समुहले दक्षिण कोरियाली खोप निर्माता कम्पनिका तथ्याङ्क चोरीको प्रयास गरेका छन् । माइक्रोसफ्टले दिएको जानकारी अनुसार उनीहरुले कोरोना भाइरस विरुद्धका खोप तथा औषधि निर्माण गरिरहेका बायोटेक कम्पनिका तथ्याङ्क चोरीको प्रयास गरेका हुन् ।

हाल उत्तर कोरियाका दुईवटा समुह ह्याकिङ गर्न सक्रिय रहेका माइक्रोसफ्टले जानकारी दिएको छ । कम्पनिका अनुसार जिङ्क तथा सेरियम नाम गरेका ति समुहले विश्वका प्रतिष्ठित सात वटा कोरोना विरुद्धको खोप विकासमा काम गरिरहेका कम्पनिहरुमा हमला गरेका छन् ।

माइक्रोसफ्टका अनुसार ह्याकरहरुले दक्षिण कोरियाका अलावा खोप निर्माणमा लागि परेका क्यानडा, फ्रान्स, भारत र अमेरिका लगायतका देशका खोप निर्माता कम्पनिका तथ्याङ्क चोरीको प्रयास गरेका छन् । ति ह्याकरहरुले के र कस्ता प्रकारका तथ्याङ्क चोरीको प्रयास गरेका हुन् भन्ने बारे भने केही खुलाएको छैन ।

उत्तर कोरिया आफैसँग औषधी निर्माणको क्षमता नभएका कारण उसले अरुका डाटा चोरी गरेर चर्चामा रहनका लागि मात्र उक्त प्रयास गरेको हुन सक्ने विज्ञहरुले बताएका छन् । उत्तर कोरियाले इमेल तथा मालवेयरको साहायताले ह्याकको प्रयास गरेको थियो ।