दक्षिण कोरियाली राजधानी सोलमा गरियो ड्रोन ट्याक्सीको सफल परिक्षण

सोल – दक्षिण कोरियाको राजधानी सोलमा ड्रोन ट्याक्सीको सफल परिक्षण गरिएको छ । सोल महानगर सरकार तथा यातायात मन्त्रालयको संयुक्त लगानीमा सुरु गर्न लागिएको नयाँ शहरी यातायात परियोजना अन्तरगत बुधबार उक्त परिक्षण गरिएको हो । दक्षिण कोरियामा उक्त ड्रोन यातायातका लागि परिक्षण गरिएको पहिलो पटक हो ।

चिनियाँ कम्पनि इहाङले निर्माण गरेको उक्त ड्रोन राजधानी सोलको हान नदि माथिबाट उडाइएको थियो । ५० मिटरको उचाइमा उडाइएको उक्त ड्रोनले ७ मिनेट समयमा ३.५ किलोमिटर दुरी पार गरेको थियो । सोल महानगर सरकार तथा भुमी, संरचना तथा यातायात मन्त्रालयका अधिकारीहरु समेत उक्त परिक्षणमा सहभागी थिए ।

एक जना पाइलट रहने उक्त ड्रोनमा एक जना यात्रु राख्न सकिन्छ । परिक्षणमा भने सुरक्षालाई ध्यानमा राख्दै २० किलो गोटाका ४ वटा चामलका बोरा राखिएको थियो । उक्त ड्रोनले योवीदो, सोङ्गाङ, बामस्योम तथा मापो पूल माथिबाट उडान गरेको थियो ।

८ वटा पंखा रहेको उक्त ड्रोनले सिधै उडान भर्न तथा अवतरण गर्न सक्छ । अधिकतम गति १३० किमी प्रति घण्टाा रहेको उक्त ड्रोनले इञ्चोन अन्तराष्ट्रिय बिमानस्थलबाट योविदो सम्म पुग्न करिव २० मिनेट समय लाग्दछ । सोल महानगर सरकारले प्रकृया पुरा गरेर सन् २०२५ बाट ब्यवसायिक रुपमा नै उक्त ड्रोनलाई हवाई ट्याक्सीका रुपमा प्रयोगमा ल्याउने योजना अनुरुप काम गरिरहेको छ ।