उत्तर कोरियाली नेता किम जोङ उनले बहिनीसँगै गरे बाढी प्रभावित क्षेत्रको पुनर्निर्माण गतिविधिको निरिक्षण

सोल – उत्तर कोरियाली सर्वोच्च नेता किम जोङ उनले हालै आफ्नी बहिनी किम यो जोङ सहित बाढी प्रभावित क्षेत्रमा भइरहेको पुनर्निर्माण गतिविधिको निरिक्षण भ्रमण गरेका छन् । करिव २ महिनाबाट सार्वजनिक कार्यक्रममा नदेखिएकी किमकी बहिनीलाई २ महिना पछि पहिलो पटक उक्त भ्रमणमा देखिएको थियो ।

उक्त भ्रमणका क्रममा किमले बाढी प्रभावित क्षेत्रमा भइरहेका पुनर्निर्माण गतिविधिहरु बारे जानकारी लिएका थिए । किमावा स्थित केन्द्रीय सिमा क्षेत्रमा बाढीले क्षति पुर्याएका सडक , कृषि, दुरसञ्चार पशुपालन, विद्युत लगायतका क्षेत्रको पुनर्निर्माण प्रगति बारे समेत किमले जानकारी लिएका थिए ।

किमले पुनर्निर्माणका कामहरु ८८ प्रतिशत बढी सम्पन्न भएको समाचारसँगै उक्त क्षेत्रको भ्रमण गरेका थिए । निरिक्षण भ्रमण पश्चात प्रतिकृया दिँदै किमले आफ्नो पार्टीको नेतृत्व तथा निर्देशनमा सेनाले गरेको उक्त काम प्रशंशनीय रहेको प्रतिकृया समेत दिएका छन् । उक्त क्षेत्रमा करिव १००० वटा घरहरुको पुनर्निर्माण सम्पन्न भइसकेको छ ।

किमले यो बर्ष सिङ्गो देशका लागि दु:ख र पिडाको बर्ष भएता पनि आफू त्यसरि दु:ख मानेर नबस्ने बरु कडा मेहनत गरेर उक्त दु:ख माथिको बिजयको बर्षको रुपमा यो बर्षलाई लिने समेत उनले बताएका छन् । उनको उक्त भ्रमणमा जुलाईबाट सार्वजनिक कार्यक्रममा नदेखिएकी किमकी बहिनी समेत सँगै उपस्तिथ रहेकी थिइन् ।

उत्तर कोरियाली सञ्चार माध्यम रोडोङ सिनमुनले भ्रमणको ठ्याक्कै मिति नखुलाएता पनि उक्त तस्विरमा किम भन्दा केही टाढा उनकी बहिनी समेत बाढी प्रभावित क्षेत्रको निरिक्षण भ्रमणमा गएको देख्न सकिन्छ ।