कोरियामा बिदेशी कामदारको पीडा, ‘न काम, न त घर जाने प्लेनको टिकट नै ‘

सोल -दक्षिण कोरियाका स्थानीयहरुले छुसक विदा मनाइरहँदा त्यहाँ कार्यरत आप्रवासी कामदारहरुमा भने पीडा थपिएको छ ।

कोरोना भाइरसका कारण रोजगार गुम्दा तथा घर जान नपाउँदा पीडा झनै थपिएको छ । हाल ती बिदेशी कामदारहरु परिवार सम्झन बाहेक केही गर्न सकिरहेका छैनन् ।

नेपालबाट दक्षिण कोरिया रोजगारका लागि आएका ४४ बर्षिय मेघ थापाले भने – “म घर जान चाहान्छु र म जस्तै धेरै नेपालीहरु समेत घर जान चाहान्छन् । बिडम्बना ! घर जान न त प्लेन नै छ न त काम नै । बिना काम कसरि बस्ने? अब हामी के गर्न सक्छौँ ? ”

मार्च २७ मा नेपाल जाने तयारीमा रहेका थापाले करिव ५ बर्ष ख्यंगी प्रान्तको पाजु भन्ने ठाउँमा म्यानुफ्याक्चरिङ अन्तरगत काम गरि परिवारका लागि बचाएको सम्पुर्ण रकम कोरियामा नै सकिन लागेको पिडा सुनाए । उनले भने – ” म घर जान तयार भएर टिकट पर्खिरहेको छु तर जाने कुनै प्लेन नै छैन ” ।

उनी एक प्रतिनिधि पात्र मात्र हुन् । उनी जस्तै करिव ८ हजार जना आफ्नो करार मिति सकिएर घर जान झोला बाँधेर ठीक्क परेर बसेका छन् जो कोरोना महामारीका कारण विमानहरुले उडान बन्द गर्दा दक्षिण कोरियामा नै थन्किएका छन् ।

दक्षिण कोरिया सरकारले ५० दिनको भिसा म्याद त थपिदियो तर उक्त थपिएको अवधिमा काम गर्न भने नपाइने भएकाले दैनिकी झनै कष्टकर बनाएको थापाले बताएका छन् । थापाले नेपाली दुतावासमा घर जान आवेदन दिएका भएता पनि उनको पालो करिव १००० जना पछि मात्र आउने उनी बताउछन् ।

हाल उनी जस्तै आप्रवासी कामदारहरु काम नभएका कारण साथीहरुको कोठामा शरण लिएर बसेका छन् । कतिपयलाई सरकारले डिटेन्शन केन्द्रमा समेत राखेको छ । सरकारले उपलब्ध गराएका कोरोना संक्रमणसँग सम्बन्धित सुविधा समेत प्राप्त गर्न नसक्दा दैनिकी कष्टकर भएको उनीहरु बताउदछन् ।

हालका यी विविध समस्याको समाधानका लागि दक्षिण कोरियाली अधिकारकर्मीहरुले भने भिसा सँगसँगै काम गर्न दिइने अनुमति समेत थप्नु पर्नेमा जोड दिएका छन् । यसो गरिएमा गैरकानुनी काम गर्ने पद्दति हट्ने र भिसा म्याद गुज्रिएर पनि घर जान नपाएकाहरुको दैनिकीमा केही मलमपट्टी लाग्ने अधिकारकर्मीहरुले बताएका छन् । यो समाचार कोरिया हेराल्डको सहयोगमा तयार गरिएको हो।