दक्षिण कोरियाका हरेक १० मध्ये ४ जनामा मानसिक समस्या

सोल – दक्षिण कोरियाको राजधानी सोलमा हालै गरिएकोखएक अध्ययनले कोरियामा बसोबास गर्ने नागरिकहरुमा कोरोना भाइरसका कारण मानसिक समस्या उत्पन्न भएको बताएको छ । उक्त अध्ययन अनुसार राजधानी सोलका हरेक १० जना मध्ये ४ जनामा मानसिक समस्या पाइएको छ ।

१३ बर्षबाट ८० बर्ष उमेर समुहका ३९८३ जनामा गरिएको उक्त अध्ययनमा १४८९ जनाले कोरोना भाइरसका कारण आफूमा मानसिक समस्या उत्पन्न भएको बताएका छन् । उक्त संख्या सर्वेक्षणमा सहभागीहरुको संख्याको ४० प्रतिशत हो । बाँकी ६० प्रतिशतमा समेत सामान्य मानसिक असर परेको अध्ययनले बतताएको छ ।

उक्त अध्ययन राजधानी सोलको महानगर सरकारले जुलाईबाट अगष्ट सम्म सञ्चालन गरेको थियो । उक्त अध्ययनको नतिजा आइबिएम कम्पनिको सहयोगमा आर्टिफिसियल इन्टेलिजेन्सको प्रयोग गरेर लिइएको थियो ।

सर्वेक्षणमा सहभागीहरुले मानसिक समस्या उत्पन्न हुने प्रमुख कारणका रुपमा आर्थिक समस्या, बचतमा ब्यापक गिरावट, कार्य व्यस्तता, घरबाहिर खुलेर हिड्न नपाइने बाध्यता, परिवारसँगको फाटो आदि रहेका छन् । कतिपयले मास्क लगाउनु पर्दा समेत आफूमा मानसिक समस्या आएको बताएका छन् ।

त्यसका अलावा बेरोजगार, भएको रोजगारी गुमेको, तलवमा कमी लगायतका कारण आफूहरुमा मानसिक समस्या आएको सर्वेक्षणमा सहभागीहरुले बताएको सोल महानगर सरकारले बताएको छ ।