रसियाद्वारा उत्तर कोरियालाई २५,००० टन गहुँ सहयोग

सोल – पटक पटक समुद्री आँधीबाट प्रताडित बनेको उत्तर कोरियालाई रसियाले खाद्यान्न सहयोग गरेको छ । उत्तर कोरियाका लागि रसियन मिसनका अधिकारीका अनुसार रसियाले समुद्री आँधी पश्चात आएको बाढी प्रभावितलाई सहयोगार्थ २५,००० टन गहुँ सहयोग गरेको हो ।

खाद्यान्न भित्र्याउँदा कोरोना संक्रमण समेत भित्रीन सक्ने सम्भावनालाई ध्यान दिँदै कडा स्वास्थ्य सुरक्षा अपनाएर शनिबार उक्त परिमाणको खाद्यान्न उत्तर कोरिया लगिएको रसियन दुतावासले जनाएको छ ।

खाद्यान्न सहयोग पश्चात उत्तर कोरियाले रसियाल‌ी जनता तथा सरकारप्रति कोरोना तथा समुद्री आँधीको दु:खका बेला गरेको उक्त सहयोगको मुक्तकण्ठले प्रशंशा गरेको दुतावासले जनाएको छ ।

पछिल्ला हप्ताहरुमा उत्तर कोरियामा तीनवटा शक्तिशाली समुद्री आँधी आएका छन् जसका कारण ठूलो परिमाणमा धननमाल, खाद्य बाली तथा मानिसहरुको हताहती भएको थियो ।

आँधीबारे पर्याप्त गृहकार्य नगरेको भन्दै खरो रुपमा उत्रीएका नेता किम पछिल्लो पटकको प्रभावित क्षेत्र भ्रमणका क्रममा भने केही खुसी देखिएका थिए । उनले पुनर्निर्माण कार्यलाई तीब्रताका साथ अगाडी बढाउन समेत निर्देशन दिएका छन् ।