दक्षिण कोरियामा ५ महिना यताकै उच्च संक्रमण

सोल — कोरोना माहामारीबाट लगभग मुक्त भइसकेको दक्षिण कोरियामा पुनः संक्रमण फैलिन थालेको छ । आज दक्षिण कोरियामा कोरोना संक्रमणका ३२४ जना नयाँ विरामीहरु थपिएका छन् । दक्षिण कोरियाली रोग तथा प्रकोप नियन्त्रण केन्द्रका अनुसार उक्त संक्रमण विगत ५ महिना यताकै उच्च हो ।
हाल सम्म दक्षिण कोरियामा कोरोनाका १६६७० जना संक्रमित फेला परेका छन् भने ३०९ जनाले संक्रमणबाट ज्यान गुमाइसकेका छन् । केन्द्रका अनुसार पछिल्लो पटक भेटिएका मध्ये ९ जना विदेशबाट आएका संक्रमित रहेका छन् भने अन्य कोरियाका बिरामी रहेका छन् ।
दक्षिण कोरियाको राजधानी सोल, जियोङ्जी र इञ्चोन लगायतका मुख्य शहरी क्षेत्रमा संक्रमितहरु अधिकतम रुपमा फेला परेका छन् । केन्द्रका अनुसार चर्चसँग सम्बन्धित ७३२ जना संक्रमित यो साता थपिएको पनि केन्द्रले जनाएको छ । उक्त संख्या अझै बढ्ने समेत केन्द्रले जनाएको छ ।
१५ अगष्टमा भएको र्याली पश्चात दक्षिण कोरियाका मुख्य शहरहरुमा कोरोना संक्रमण तीब्र रुपमा फैलिन थालेपछि सरकार आक्रामक रुपमा प्रस्तुत हुन थालेको छ । सरकारले भीडभाड, प्रदर्शन लगायतका गतिविधिहरुमा पुर्ण बन्देज लगाएको छ भने सरकारी निर्देशनको अवज्ञा गर्नेलाई कडा भन्दा कडा कारवाही गर्ने चेतावनी समेत दिएको छ ।