जलरंग त्रिनालेमा कलाकार एनबी गुरुंगको सहभागीता

चर्चित युवा कलाकार एनबी गुरुंग जापानको कोबे सहरमा आयोजना गरिएको जलरंग ट्रिनालेमा भाग लिएर फर्केका छन्। नेपालको प्रतिनिधित्व गर्दै जापान पुगेका गुरुंगले नेपाली मौलिक कला प्रदर्शनी गर्नुका साथै सहभागी कलाकारहरुलाई दुईदिने जलरंगको प्रशिक्षण समेत दिएका थिए।

हरेक तीन / तीन बर्षको अन्तरालमा आयोजना गरिने उक्त त्रिनालेमा ३५ देशका १६५ वटा चित्रकला प्रदर्शनीमा राखिएका थिए । प्रकृती, मुहारचित्र, मानव दैनिकी लगायत समसामयीक चित्रहरुको बाहुल्य रहेको उक्त प्रदर्शनीमा सहभागी कलाकारहरुले आ-आफ्नो देशको कला र संस्कृतिको पछिल्लो विकासक्रमलाई देखाउने प्रयत्न गरेका थिए। कार्यक्रमा चित्रकलाको डेमोन्ट्रेसन,यथास्थान चित्र निर्माण र कलासम्बन्धी विविध बिषयमा छलफलको आयोजना समेत गरिएको थियो।

मार्च १२ तारिख देखि सुरु भई मार्च १८ सम्म चलेको उक्त प्रदर्शनीमा चित्रकला अबलोकन गर्नेहरुको ठूलो भिड लागेको थियो। “जापानजस्तो समृद्द देशमा नेपाली कलाकारले आफ्नो कलाको प्रदर्शनी गर्ने अवसर प्राप्त गर्नु सिंगो नेपाल र नेपालीको गौरबको विषय हो” कलाकार गुरुंगले खुसि ब्यक्त गर्दै भने।
कार्यक्रमको समापन पछि जापानको विभिन्न सहरहरु समेत भ्रमण गरेका गुरुंगले नेपाली राजदुतावास टोकियोमा नेपालका राजदुत डा। दुर्गाबहादुर क्षेत्रीसॅग समेत भेटघाट गरेका थिए। उक्त भेटघाटमा दुतावासको पहलमा नेपाली कलालाई जापानमा प्रचारप्रसार र विकास गर्ने भन्नेबारेमा छलफल भएको थियो।

जलरंग समाज नेपालका अध्यक्ष समेत रहेका कलाकार गुरुंगले यसअघि युरोप , कोरिया बंगलादेश, थाईल्याड ईन्डोनेशिया आदि देशमा पुगेर नेपाली कला र कलाकारको प्रतिनिधित्व गरिसकेका छन् ।