वियोन्से पछ्याउँदै प्रियंका

काठमाडौं – लस एन्जल्सबाट सञ्चालित बजनेट नामक सोसल मिडिया नेटवर्कले गरेको पोलमा गायिका वियोन्से विश्वकै सर्वाधिक सुन्दरीमा सूचीकृत भएकी छन् भने उनलाई बलिउड नायिका प्रियंका चोपडाले पछ्याएकी छन् ।

अमेरिकी टिभी सिरिज ‘क्वान्टिको’ एक्ट्रेस प्रियंकाले मोडल टेलर हिललाई तेस्रो स्थानमा छोडेकी हुन् । फिल्म ‘बेवाच’ मार्फत् हलिउड डेब्यु गर्न लागेकी प्रियंका पछिल्ला समय हुने गरेका सौन्दर्यसम्बन्धी पोलमा अगाडि रहँदै आएकी छन् । त्यसो त उनी लगातार दुई वर्ष पिपुल्स च्वाइस अवार्ड पनि जित्न सफल बलिउड नायिका हुन् ।

सर्वाधिक सुन्दरीको सूचीमा एम्मा वाट्सन चौथो, डाकोटा जोहन्सन पाँचौं स्थानमा अटाएका छन् भने हिलारी क्लिन्टन छैटौंमा परेकी छन् । जबकी हलिउडकी चर्चित नायिका एन्जेलिना जोली आठौं सुन्दर महिलाका रुपमा मत पाएकी छन् । यस वर्षको ओस्कार अवार्ड विजयी नायिका एम्मा स्टोन भने १२ औं नम्बरमा परेकी छन् ।

प्रियंका फिल्म नायिका हुँदै यतिबेला आफूलाई गायिकाका रुपमा पनि चिनाउन तल्लीन छिन् । गीत नै गाउन अमेरिका छिरेकी थिइन् प्रियंका । फिल्ममा पनि भिन्न चरित्र निर्वाहका लागि प्रयोग गरिरहन रुचाउने ३३ वर्षीया प्रियंका वास्तविकतामा पनि विभिन्न भूमिकामा आफूलाई सिद्ध गर्न चाहन्छिन् ।

हालै उनले आफ्नो इन्स्टाग्राममा पेन्टिङ गर्दै गरेको फोटो सेयर गरेकी छन् । क्याप्सनमा उनी आफू पेन्टिङ सिक्दै गरेको पनि खुलाउनुले प्रियंकाको पेन्टिङ आर्टिस्ट हुने मोह पनि झल्कन्छ । त्यसो त बलिउडमा सलमान खान र सोनाक्षी सिन्हा पनि फुर्सदको समयमा आफूलाई पेन्टिङ बनाउनमा व्यस्त राख्छन् ।