कक्षा १२ को परीक्षा संक्रमणको अवस्था हेरेर निर्णय लिन्छौँ : राष्ट्रिय परीक्षा बोर्ड

काठमाडौँ- कोरोना संक्रमणको अवस्था हेरेर मात्रै कक्षा-१२ को परीक्षाबारे राष्ट्रिय परीक्षा बोर्डले निर्णय लिने भएको छ । बोर्डका अध्यक्ष प्राडा चन्द्रमणि पौडेलले कोरोनाले रोकिएको परीक्षाबारे तत्काल केही निर्णय नलिने बताए ।

उनले भने, “अहिले पनि कोरोना संक्रमणको जोखिम कायम नै छ। अहिलेसम्म परीक्षाबारे केही छलफल भएको छैन।”

उनले प्रश्नपत्र छापेर तयारी अवस्थामै राखेको पनि जानकारी दिएका छन् । उनका अनुसार कोरोना संक्रमणका कारण साढे चार लाख विद्यार्थीको परीक्षा रोकिएको छ ।

बोर्डले गत जेठ १३ गतेदेखि एसइई र जेठ २६ गतेदेखि कक्षा-१२ को परीक्षा सञ्चालन गर्न परीक्षा तालिका सार्वजनिक गरेको थियो । तर, कोरोना संक्रमणदर बढ्दै गएपछि बोर्डले गत वैशाख २७ गते एसइई र कक्षा-१२ को परीक्षा स्थगित गरेको थियो ।

त्येस्तै, एसइई परीक्षा भने आन्तरिक मूल्यांकनबाट नतिजा प्रकाशित हुने भएको छ । यता,त्रिभुवन विश्‍वविद्यालयले भने कोरोनाबाट स्थगित त्रिविअन्तर्गतका स्नातक तहको वार्षिक परीक्षा साउन ५ गतेबाट सञ्चालन गर्ने गरी बिहीबार तालिका सार्वजनिक गरिसकेको छ ।