जापानका ७२ प्रतिशत बढी बच्चाहरु कोरोना भाइरसका कारण तनावमाः सर्वेक्षण

टोकियो— विश्वव्यापी महामारी कोरोना भाइरसका कारण जापानका ७२ प्रतिशत बढी बालबालिकाहरुको मानसिक स्थितिमा असर परेको एक सर्वेक्षणले जनाएको छ । राष्ट्रिय बाल स्वास्थ्य तथा विकास केन्द्रले हालै गरेको एक अध्ययनका अनुसार कोरोना भाइरसका बारेमा धेरै सोच्ने तथा त्यसकै बारेमा चिन्तन गर्ने बानी लागेका कारण उनीहरुमा एकाग्रतामा कमी, नराम्रा कुरा गर्ने जस्ता मानसिक समस्या परेको पाइएको हो ।

उक्त सर्वेक्षण अनुसार ९ प्रतिशत बालबालिकाहरुमा कोरोना संक्रमण पश्चात आफैलाई दुःख दिने, शारिरिक पिडा दिने लगायतका गतिबिधिहरु गर्ने गरेको पाइएको छ । ३२ प्रतिशत बालबालिकाले आफूमा कोरोना भाइरस भएको कुरा सार्वजनिक गर्न नमानेको तथा ४७ प्रतिशतले आफूमा कोरोना लागेको कुरा गोप्य राख्दछन् भन्ने कुरामा विश्वास गरेको पाइएको छ ।

उक्त सर्वेक्षण अनुसार २२ प्रतिशतले आफूहरु एक पटक संक्रमित भएर निको भइसकेकाहरुसँग सम्पर्कमा आउन नचाहेको समेत बताएका छन् ।

जुलाई १५ बाट २६ सम्म सञ्चालन गरिएको उक्त सर्वेक्षण मा ६७७२ जनाको विचार लिइएको थियो । उनीहरु मध्ये ९८१ जना ७ बर्ष बाट १७ बर्ष सम्मका थिए भने बाँकी ५७९१ जना १७ बर्ष भन्दा माथिका रहेका थिए ।

उक्त अध्ययन पश्चात केन्द्रले आमा बाबुलाई आफ्ना छोराछोरीसँग सम्बेदनशील रुपमा प्रस्तुत हुन अनुरोध गरेको छ । उनीहरुसँग झर्किने भन्दा पनि समस्याहरु सुनिदिने तथा सकारात्मक राय सल्लाह दिन समेत केन्द्रले अनुरोध गरेको छ । यस्तो बेला बालबालिकामा तनाव हुनु स्वभाविक रहेको भन्दै केन्द्रले आमाबाबुले समस्या समाधानमा अहम भुमिका खेल्नु पर्नेमा जोड दिएको छ ।