आज विजया दशमी : साइत १०:२ बजे

काठमाडौँ- बडादशैंको आज मुख्य दिन, विजया दशमी । आज मान्यजनहरूबाट टीका र जमरा थापेर आशीर्वाद लिँदै मनाइनी गरिन्छ ।

किम्बदन्तीअनुसार दशमीकै दिन दुर्गा भवानीले दानवी शक्तिमाथि तथा रामले रावणमाथि विजय हासिल गरेका थिए । सत्यले असत्यमाथि विजय पाएका कारण यस दिनलाई विजया दशमी भनिने गरिन्छ ।

घटस्थापनाको दिनदेखि विधिपूर्वक घरघरमा आह्वान गरी पूजाआराधना गरिने दुर्गादेवीलाई आजकै दिन विसर्जन गरी मान्यजनबाट प्रसादका रूपमा टीका, जमरा र फूल प्रसाद ग्रहण गरिन्छ । नेपाल पञ्चाङ्ग निर्णायक समितिका अध्यक्ष प्राध्यापक श्रीकृष्ण अधिकारीका अनुसार देवीलाई बिहान ८:१९ बजे उत्तम साइत रहेको छ ।

विजयादशमीका दिन साइत खोजेर टीका लगाउनेका लागि बिहान १०:२ बजेको साइत शुभ रहेको छ । टीका लगाउने मानिस पूर्व फर्कनुपर्ने समितिले जनाएको छ । त्यस दिनदेखि कोजाग्रत पूर्णिमासम्म दुर्गा भवानीको प्रसादका रूपमा मान्यजनका हातबाट टीका, जमरा तथा आशीर्वाद थाप्ने क्रम जारी रहनेछ ।