आजदेखि दशैं शुरु

काठमाडौँ- हिन्दुहरुको बडा दशैं आजदेखि शुरु भएको छ | आज घटस्थापनाको साइत बिहान १०ः३५ बजे रहेको नेपाल पञ्चाङ्ग निर्णायक समितिले जनाएको छ।

आज पहिलो दिन घरघरमा जमरा राखेर घटस्थापना गरिँदैछ।जमरा राख्नुपूर्व गाउँघरमा रातो तथा कमेरोको माटोले र सहरमा विभिन्न रङले घर लिपपोत तथा रङरोगन गर्ने गरिन्छ। घर शुद्ध भएपछि मात्र देवीको आगमन हुन्छ भन्ने धार्मिक विश्वास छ।

घटस्थापनाका दिन विधिपूर्वक जौँ, गहुँ तथा मकैलाई माटोमा छरिन्छ र टीकाको साइतमा जमरालाई फूलको रूपमा प्रयोग गर्ने चलन छ।

जमरालाई समृद्धिको प्रतीक मानिन्छ। त्यसैले टीकाको दिन आफूभन्दा मान्यजनको हातबाट टीका ग्रहण गर्दा पहेँलो जमरा नै प्रयोग गरिने हुनाले जमरा उमार्न शुद्ध माटो प्रयोग गरिन्छ।