बोन धर्मको उजागर गर्न पोखरामा ‘स-पु क्ह्याल्स साँस्कृतिक साँझ’

पोखरा-तमू प्ये ल्हु संघ केन्द्रिय युवा समितिको आयोजनामा पोखरा सभागृहमा स-पु क्ह्याल्स साँस्कृतिक साँझ सम्पन्न भएको छ ।

तमू जातिको कुल धर्म तथा बोन धर्मको बारेमा साँस्कृतिक कार्यक्रम मार्फत प्रचारप्रसार गर्न र राष्ट्रिय जनगणनामा बोन धर्मावलम्बीको सङ्ख्या अधिक बनाउने उद्देश्य सहित गत शनिबार कार्यक्रम आयोजना गरिएको थियो।

उक्त कार्यक्रममा तमु युवा कलाकारहरुले करिब दर्जन भन्दा बढी मौलिक साँस्कृतिक नृत्यहरु प्रस्तुत गरेका थिए। बिशेषगरी गुरुङ जातिको लाहुरे परम्परा, विवाह, मृत्यु लगायतको मौलिक संस्कारको बारेमा आफनो अभिनायत्मक प्रस्तुती राखेका युवा समितिका महासचिब पबित्रा गुरुङले बताईन।

उनका अनुसार गायक मिलन लामा, गायक तथा संगीतकार धनबहादुर गुरुङ र गायिका कुशुम गुरुङले आफनो गीत संगीत प्रस्तुत गरे।

उनले सो कार्यक्रममा तमू प्ये ल्हु संघ केन्द्रिय युवा समितिमा आबद्ध करिब ६० जना कलाकारले नृत्य र अभिनय प्रस्तुत गरेको उल्लेख गरिन।

तमू प्ये ल्हु संघ केन्द्रिय युवा समितिका अध्यक्ष सुकबहादुर तमूको अध्यक्षतमा भएको कार्यक्रममा उपाध्यक्ष रुपा ल्हेगे तमूले स्वागत मन्तव्य ब्यक्त गरेका थिए भने समितिका महासचिव पवित्रा तमूले कार्यक्रम सञ्चालन गरेका थिए।