अब सर्वसाधारणले पनि श्रीपेच अवलोकन गर्न पाउने

काठमाडौं – संस्कृति, पर्यटन तथा नागरिक उड्डयनमन्त्री जीवनबहादुर शाहीले श्रीपेच सर्वसाधारण जनताले अवलोकन गर्ने व्यवस्था मिलाउन निर्देशन दिएका छन् । बिहीबार नारायणहिटी दरबार संग्रहालयको स्थलगत निरीक्षणमा पुगेका मन्त्री शाहीले उक्त निर्देशन दिएका हुन् ।
 
मन्त्री शाहीले श्रीपेच तत्काल सर्वसाधारणले अवलोकन गर्नसक्ने गरी व्यवस्था मिलाउन निर्देशन दिँदै त्यसका लागि मन्त्रालयले सबै प्रकारको सहयोग गर्ने आश्वासन दिएका थिए । उनी मन्त्रालयअन्तर्गत संस्कृति महाशाखाका प्रमुखसहित नारायणहिटी पुगेका थिए ।
 
अवलोकनका क्रममा मन्त्री शाहीले ऐतिहासिक धरोहरको संरक्षणमा सबैको दायित्व रहने भन्दै यस्ता सम्पदालाई नगद पैसासँग तुलना गर्न नहुने बताएका थिए । उनले ऐतिहासिक तथा पुरातात्विक सम्पदा संरक्षण मन्त्रालयको प्राथमिकतामा रहेकोसमेत बताएको मन्त्री शाहीको सचिवालयले उल्लेख गरेको छ । संग्रहालयका प्रमुख रोहितकुमार ढुंगानाले नारायणहिटीमा खानेपानी र कर्मचारी व्यवस्थापन मुख्य समस्या रहेको जानकारी गराएका थिए ।
 
संग्रहालयका प्रमुख ढुंगानाका अनुसार श्रीपेच सर्वसाधारणको अवलोकनका लागि पनि खुला गर्ने तयारी जारी छ । त्यसका लागि सुरक्षा विश्लेषण भइरहेको उनले जानकारी दिए ।
 
सुरक्षा विश्लेषणका लागि सेनासँग समन्वय भइरहेको ढुंगानालाई उद्धृत गर्दै मन्त्री शाहीको सचिवालयले जानकारी दिएको छ । ढुंगानाले पूर्वराजा वीरेन्द्रको निजी निवास श्री सदनसमेत सर्वसाधारणको अवलोकनका लागि खुला गर्ने तयारी भइरहेको जानकारी दिएका छन् ।