आज भेरोसेल खोप लिन चीन जाँदै निगमको जहाज

काठमाडौँ- भोलि शुक्रबार सरकारले चीनबाट खरिद गरेको ४४ लाख डोज कोरोना विरुद्धको भेरोसेल खोप नेपाल आइपुग्ने भएको छ । सरकारले चीनसँग पछिल्लो पटक ६० लाख डोज भेरोसेल खोप खरिद गरेको थियो । जसमध्ये १६ लाख डोज खोप यसअघि नै आइसकेको छ ।

नेपाल वायु सेवा निगमको वाइडवडी ३३० जहाज खरिद गरेको बाँकी ४४ लाख डोज खोप लिन आज बेइजिङ जाने भएको छ । आज साँझ ५:४५ बजे निगमको वाइडवडी ३३० बेइजिङतर्फ जाने निगमले जनाएको छ ।

शुक्रबार बिहान विमान भेरोसेल खोप लिएर नेपाल आइपुग्नेछ । यसअघि निगमको जहाज खोप लिन बुधबार नै जाने र आज खोप ल्याउने बताइएको थियो । तर, पछि तालिका संशेधन गर्दै एक दिन पछाडि सारिएको हो ।

भेरोसेल खोप यसअघि एक भाइलमा दुई डोज मात्र हुन्थ्यो । जसका कारण एक पटकको फ्लाइटमा ८ लाख भाइल ल्याउने गरिएको थियो । तर अहिले चीनले एक भाइलमा ५ डोजको खोप उत्पादन गर्दै आएको छ । जसका कारण एकै पटक ४४ लाख डोज खोप ल्याउन सकिने भएको हो ।

भेरोसेल खोप सुरुमा एक भाइलमा एक डोज, त्यसपछि एक भाइलमा दुई र अहिले एक भाइलमा पाँच डोज आउन थालेको हो । नेपालमा यसअघि कोभिसिल्ड २४ लाख ४८ हजार, ७४ लाख डोज भेरोसेल, १६ लाख डोज जोन्सन एन्ड जोन्सन, १७ लाख ७७ हजार ३२० डोज एस्ट्राजेनेका खोप आइसकेको छ ।

असोजमा गाभीमार्फत १ लाख डोज फाइजर खोप आउनेछ भने यसैवर्षको अन्त्यसम्म ६० लाख फाइजर ४० लाख मोडर्ना गरी एक करोड डोज खोप आउने बताइएको छ । फाइजर मंसिर सम्ममा आउने छ भने मोडर्ना केही समयपछि आउने बताइएको छ ।