उपत्यकामा आजदेखि ५० वर्षमाथिकालाई भेरोसेल खाेप लगाइँदै

काठमाडौँ- काठमाडौं उपत्यकाका तीनै जिल्ला काठमाडाैं, भक्तपुर तथा ललितपुरमा आज बिहीबारदेखि पहिलो मात्राको चिनियाँ खोप भेरोसेल अभियान सुरु हुँदै छ ।

यसअघि छुटेका र ५० वर्षभन्दा माथिकालाई खोप दिन लागिएको हो । खाेपकेन्द्रकाे व्यवस्था भने स्थानीय तहले गर्ने जनाइएकाे छ ।

काठमाडौं महानगरपालिकाका ३२ वटै वडामा खोप केन्द्र रहने काठमाडौंका प्रमुख जिल्ला अधिकारी कालिप्रसाद पराजुलीले बताएका छन् ।

यस्तै, अत्यावश्यक सेवाका व्यक्तिहरुको हकमा पाँचवटा अस्पताललाई खोप केन्द्र तोकिएको छ ।

जसमा राधास्वामी आइसोलेसन सेन्टर सामाखुशी, वीर अस्पताल काठमाडौं, निजामती अस्पताल नयाँ बानेश्वर, टिचिङ अस्पताल महाराजगञ्ज तथा शुक्रराज ट्रपिकल तथा सरुवा रोग अस्पताल टेकु छन् ।

यस्तै, फरक क्षमताका व्यक्तिहरुले पहिलो मात्राको भेरोसेल खोप नजिकका खोप केन्द्र वा पायक पर्ने स्थानमा गएर लगाउन पाउने छन् ।