कोरोनाविरुद्धको खोप अब अनलाइनमा नाम दर्ता गर्नेले मात्रै पाउने

काठमाडौँ- अबदेखि कोरोनाविरुद्धको खोप लगाउन स्वास्थ्य कार्यालय काठमाडौंले अनलाइन फारम अनिवार्य गरेको छ । स्वास्थ्य कार्यालय काठमाडौंका प्रमुख बद्रीबहादुर खड्काले काठमाडौँ उपत्यकासहित देशैभर कोरोनाविरुद्धको खोप लगाउन अनलाइन फारम अनिवार्य गरिएको बताएका छन् ।

उनले अबदेखि १८ वर्षदेखि ५० वर्ष उमेर समूहका नागरिकले विद्युतीय (अनलाइन) दर्ता नम्बर ल्याए मात्र कोरोनाको खोप लगाउन पाउने जानकारी दिएका छन् ।

प्रमुख खड्काले स्वास्थ्य तथा जनसंख्या मन्त्रालयको साउन १ गतेको पत्रअनुसार उक्त निर्णय भएको बताएका छन् । सो उमेर समूहका नागरिकलाई नाम दर्ता गराउनसमेत उनले आग्रह गरेका छन् । यसअघि कोरोनाविरुद्ध खोपका लागि अनलाइन दर्ता गर्नेका लागि छिट्टै सूचना गरेर खोप दिन सुरु गर्ने उनले बताएका छन् ।

यसअघि ५० वर्षभन्दा माथिका नागरिकले खोप पाएको उनले बताए । उनले भने, “क्रमशः उमेर समूह झर्दै जान्छ । अब ४५ देखि ४९ वर्षका नागरिकलाई खोप दिइन्छ।”

१८ वर्षभन्दा माथिका नागरिकले https://vaccine.mohp.gov.np मा गएर अनलाइन दर्ता गर्न सक्ने उनले बताए ।