वीरगञ्जमा बढ्यो चहलपहल

पर्सा- कोरोना संक्रमण दर ओरालो लागेपछि वीरगञ्जमा निषेधाज्ञाबीच मानिसको चहलपहल बढ्न थालेको देखिएको छ ।

दोस्रो लहरको कोरोनाले ठप्प वीरगञ्ज बजार क्षेत्र केही दिनअघिसम्म सुनसान थियो । अस्पताल क्षेत्रमा मात्र मानिसको अलि बढी चहलपहल देखिन्थ्यो । तर, पछिल्ले २⁄३ दिनदेखि मानिसको उपस्थिति बढेको छ । बजार क्षेत्रका पसलहरु पनि बाहिरबाट सटर बन्द देखिए पनि साइडबाट खुलेको पाइन्छ ।

ड्यूटीमा खटेका सुरक्षाकर्मीले पनि पछिल्ला केही दिनयता मानिस आवातजावत बढेको स्वीकारे । दोस्रो लहरको कोरोनाले गाँजेर हटस्पट भएको वीरगञ्ज क्षेत्रमा एक साता यता परीक्षण गरिएकामध्ये २० प्रतिशतभन्दा कममा मात्र संक्रमण देखिएको छ। यो थाहा पाएर पनि सर्वसाधारणको बजार क्षेत्रमा सलबलाहट बढेको छ।