बाँकेमा थप चार संक्रमितको मृत्यु

बाँके- थप चार जना संक्रमितको बाँकेमा मृत्यु भएको छ । शुक्रबार बेलुकादेखि शनिबार बिहान ९ बजे समय अवधिभित्र उनीहरुको उपचारका क्रममा बाँकेका दुईवटा अस्पतालमा मृत्यु भएको हो । मृत्यु हुनेमा २ जना बर्दिया र २ जना दाङका छन् ।

बर्दिया मधुवन नगरपालिका ६ की ५२ वर्षीया महिला, राप्ती गाउँपालिका ६, दाङकी ५२ वर्षीया महिला र लमही नगरपालिका ३, दाङका ४० वर्षीय पुरुषको मेडिकल कलेज कोहलपुरमा उपचारका क्रममा मृत्यु भएको जिल्ला कोभिड १९ संकट व्यवस्थापन केन्द्र बाँकेका फोकल पर्सन तेज वलीले बताएका छन् ।

वलीले बढैयाताल गाउँपालिका ४, बर्दियाका ३५ वर्षीय पुरुषको भेरी अस्पताल नेपालगन्जमा मृत्यु भएको जानकारी दिए । योसँगै बाँके जिल्लाभित्रका २८८ जनाको कोरोनाबाट ज्यान गएको छ भने, बाहिरी जिल्लाबाट बाँकेमा उपचार गराउन आई ज्यान गुमाउनेको संख्या २७४ पुगेको छ ।