थप एक हप्ताका लागि बढ्यो बाँकेमा निषेधाज्ञा

नेपालगञ्ज- बाँकेमा जारी निषेधाज्ञालाई सात दिन बढाइएको छ।

प्रमुख जिल्ला अधिकारी शिवराम गेलालको अध्यक्षतामा बसेको सुरक्षा समितिको बैठकले निषेधाज्ञालाई सात दिन निरन्तरता दिने निर्णय गरेको हो । प्रजिअ गेलालले जेठ १७ गते राति १२ बजेसम्म निषेधाज्ञा जारी रहने बताए ।

जोखिमको अवस्था अझै कायम रहेकाले निषेधाज्ञालाई निरन्तरता दिइएको प्रजिअ गेलालले बताए । बाँकेमा पाँचौँपटक निषेधाज्ञा बढाइएको छ । जिल्लामा वैशाख १३ गतेदेखि निषेधाज्ञा कायम छ ।

नेपालगञ्ज क्षेत्रमा वैशाख ९ गतेदेखि नै निषेधाज्ञा लगाइएको थियो। बाँकेमा पछिल्ला दिनमा मृत्यु र संक्रमणदरमा कमी आएको छ ।