बुटवलमा थप चार कोरोना संक्रमितको मृत्यु

बुुटवल – बुटवलमा थप चार जनाको कोरोना संक्रमणबाट मृत्यु भएको छ ।

लुम्बिनी प्रादेशिक अस्पताल बुटवलको आकस्मिक कक्षमा शुक्रबार (आज) बिहान तीन जना र बिहीबार राति एक जना गरी थप चार जना कोरोना संक्रमितको मृत्यु भएको हो ।

गुल्मीको चन्द्रकोट गाउँपालिका-४ की ५६ वर्षीया महिलाको बिहान ४ बजे, नवलपरासी बर्दघाट नगरपालिका-४ का ६२ वर्षीय पुरुष बिहान ३ बजे र नवलपरासी बर्दघाट नगरपालिका-४ कै ३९ वर्षीय पुरुषको बिहान ७ : २५ बजे मृत्यु भएको अस्पतालका सूचना अधिकारी डा. विष्णु गौतमले जानकारी दिएका छन् ।

यसमध्ये बर्दघाटका ३९ वर्षीय पुरुषको धागो कारखानास्थित कोरोना विशेष अस्पतालको आईसीयूमा मृत्यु भएको हो।

यस्तै रुपन्देही सैनामैना-१० का ७७ वर्षीय पुरुषको बिहीबार साँझ ७ बजे मृत्यु भएको सूचना अधिकारी डा. गौतमले बताए। उनका अनुसार तीनै जनालाई श्वासप्रश्वासमा समस्या देखिएको थियो।