नेपालगञ्जमा एकैदिन २२७मा कोरोना पुष्टि, गण्डकीमा मृत्यु हुनेको संख्या २२३ पुग्यो

नेपालगञ्ज- शुक्रबार भेरी अस्पताल नेपालगञ्जमा २२७ नयाँ कोरोना सङ्क्रमित थपिएका छन् भने सङ्क्रमणबाट थप तीन जनाको मृत्यु भएको छ । बिहीबार अस्पतालको प्रयोगशालामा २१४ जना थपिएकामा शुक्रबार १३ जना बढी थपिएका हुन् । तीमध्ये १२८ पुरुष र ९९ महिला रहेको अस्पतालले जनाएको छ । सङ्क्रमण पुष्टि हुनेमध्ये बाँकेका सबैभन्दा बढी छन् भने नेपालगञ्ज उपमहानगरपालिकाका मात्रै करीब ५० प्रतिशत नयाँ सङ्क्रमित छन् ।

सङ्क्रमितको सङ्ख्या बढेसँगै भेरी अस्पतालमा मृत्यु हुनेको सङ्ख्या पनि बढ्न थालेको छ । अस्पताले गए राति थप तीन जनाको उपचारका क्रममा मृत्यु भएको जनाएको छ । मृत्यु हुनेमा बाँकेको नेपालगञ्ज उपमहानगरपालिका–७ की ५७ वर्षीया महिला, बढैयाताल गाउँपालिका–७ बर्दियाकी ४७ वर्षीया महिला र गोदावरी नगरपालिका–११ कैलालीका ६२ वर्षीय पुरुष रहेका छन् ।

बिहीबार बाँकेका अस्पतालमा उपचार गराइरहेका कोरोना सङ्क्रमितमध्ये १२ जनाको मृत्यु भएको थियो । जिल्ला कोभिड–१९ सङ्कट व्यवस्थापन केन्द्रका कोरोना फोकल पर्सन तेज वलीका अनुसार बाँकेका नौ, कैलालीका दुई र बर्दियाका एक जनाको मृत्यु भएको हो ।

यस्तै पोखरामा थप दुई जना कोरोना संक्रमितको मृत्यु भएको छ । स्वास्थ्यमा समस्या देखिएपछि अस्पताल भर्ना गरिएका पोखरा महानगरपालिकाकी एक महिला र स्याङ्जाको अर्जुन चौपारीका एक पुरुषको उपचारका क्रममा मृत्यु भएको हो ।

प्रदेश स्वास्थ्य निर्देशक डा विनोदबिन्दु शर्माले पोखरा महानगरपालिका–६ की ८२ वर्षीया महिला र स्याङ्जाको अर्जुनचौपारी गाउँपालिका–५ का ६२ वर्षीय पुरुषको मृत्यु भएको जानकारी दिए ।

उनका अनुसार पोखरा–६ की ८२ वर्षीया महिलाको पोखरास्थित चरक मेमोरियल अस्पतालमा उपचारका क्रममा निधन भएको हो ।

उनलाई बैशाख १५ गते कोरोना संक्रमण पुष्टि भएको थियो । त्यसैगरी स्याङ्जाको अर्जुन चौपारी गाँउपालिका–५ का ६२ वर्षीय पुरुषको मणिपाल शिक्षण अस्पतालमा मृत्यु भएको हो । उनलाई बैशाख ५ गते कोरोना संक्रमण पुष्टि भएको थियो ।

योसँगै गण्डकीमा कोरोनाबाट मृत्यु हुनेको संख्या २२३ पुगेको छ । प्रदेशमा कोरोना संक्रमितको संख्या १८ हजार ३८८ पुगेको छ । तीमध्ये १६ हजार ८१० जना निको भएका छन् ।