उत्तर कोरियामा कोरोना संक्रमण शून्य

सोल – उत्तर कोरियामा हालसम्म एक जना पनि कोरोना संक्रमित नभेटिएको रिपोर्ट विश्व स्वास्थ्य संगठनलाई उसले बुझाएको छ । अक्टोबर २९ सम्मको तथ्याङ्क सार्वजनिक गर्दै विश्व स्वास्थ्य संगठनले उक्त जानकारी दिएको हो ।

सेप्टेम्बर सम्ममा ३ हजार जनाको कोरोना परिक्षण गरेको उत्तर कोरियाले अक्टोबर महिनाको अन्त्य सम्म आइपुग्दा १० हजार ४ सय बैसाठ्ठी जनाको कोरोना परिक्षण गरेको स्वास्थ्य संगठनका उत्तर कोरिया प्रतिनिधिले बताएका छन् ।

विश्व स्वास्थ्य संगठनले एकै महिनामा कसरि त्यति धेरै परिक्षण गरिए भन्ने बारे शंका ब्यक्त गरेता पनि उत्तर कोरियाली अधिकारीले भने परिक्षण गर्ने मेसिनहरु विस्तार गरिएकाले परिक्षणको संख्या बढेको जवाफ दिएका छन् ।

हालसम्म उत्तर कोरियामा ३२ हजार ११ जना ब्यक्तिहरु क्वारेन्टाइन अवधि पुरा गरेर घर फर्किएको तथ्याङ्क संगठनलाई उपलब्ध गराएको समाचारमा जनाइएको छ । यता विश्व स्वास्थ्य संगठनले उत्तर कोरियामा अक्सिजन, थर्मोमिटर लगायतका स्वास्थ्य सामाग्रीहरु उत्तर कोरिया पठाइसकेको छ ।