बुटवलमा दुईको मृत्यु, एकमा संक्रमण पुष्टि, एक शंकास्पद

बुटवल : बुटवलको कोरोना विशेष अस्पतालमा उपचाररत दुई जनाको मृत्यु भएको छ । दुबैको आज बिहान मृत्यु भएको हो । मृतकमध्ये एक जना कोरोना संक्रमित भएको अर्का शंकास्पद संक्रमित ब्यक्ति हुन ।
मृतक दुबै जना कपिलवस्तु जिल्लाका भएको अस्पताल कोरोना फोकल पर्सन डा. सुदर्शन थापाले बताए ।
उनका अनुसार मृतकमध्ये एक जना कपिलवस्तु नगरपालिका २ तौलिहवाका ४२ वर्षे पुरुष कोरोना संक्रमित हुनुहुन्छ । उहाँलाई साउन २५ गते कोरोना विशेष अस्पतालमा ल्याइएको थियो । अस्पतालमा ल्याए लगत्तै आसीयुबाट भेन्टीलेटरमा सारिएकोे थियो ।
उनको बिहान ४ः३० बजे मृत्यु भएको अस्पतालले जनाएको छ । अर्का मृतक कपिलवस्तुको कृष्णनगर नगरपालिका १३ का २२ वर्षे युवा हुन्। उनलाई साउन २७ गते अस्पताल ल्याइएको थियो ।
गम्भीर अवस्था देखिएपछि उनलाई आइसीयु हुँदै उसैदिन भेन्टीलेटरमा राखिएको थियो । उनिहरु भारतबाट आएका थिए । तर, उनको नतिजा आउन बाँकी छ । उनको बिहान ३ बजे मृत्यु भएको अस्पतालल जनाएको छ ।