उत्तर कोरियाको आणविक गतिविधि अध्ययन

सोल – दक्षिण कोरियाली तथा अमेरिकी संयुक्त सुरक्षा फौजले हाल उत्तर कोरियाको योङ्ब्योन क्षेत्रमा रहेको एक आणविक कारखाना वरपर भइरहेका गतिविधिहरुको शुक्ष्म अध्ययन गरिरहेको समाचारमा बताइएको छ । उक्त क्षेत्रमा शंकास्पद गतिविधि पाइए पश्चात निगारानी बढाइएको सैन्य श्रोतले बताएको छ ।

गत हप्ता उक्त क्षेत्रमा रहेको एक ठूलो भवनबाट ठूलो धुँवाको मुस्लो देखिएको तस्विर एक अमेरिकी वेवसाइट मार्फत सार्वजनिक गरिएको थियो । उक्त घटना पश्चात अमेरिकी तथा दक्षिण कोरियाली सैन्य अधिकारीहरु अनुसन्धानमा जुटेको कोरियाली समाचारसंस्थाहरुमा समाचार छापिएको छ ।

उक्त भवन पहिला युरेनियम प्रशोधन गर्न प्रयोग गरिने गरिएका कारण दक्षिण कोरियाली तथा अकेरिकी सेनाले उक्त घटनालाई चासोका साथ लिएको सुरक्षा अधिकारीहरुले बताएका छन् । उक्त भवनमा पहिले ५ मेगावाटको युरेनियम इन्धन उत्पादन कारखाना राखिएको थियो ।

सुरक्षा अधिकारीले हाल उक्त क्षेत्रको बारेमा यसै भन्न नसकिने र ब्यापक अध्ययन पश्चात मात्र वास्तविकता थाहा हुने जानकारी दिएका छन् । सन् २०१८ मा उक्त भवन भत्काउने सहमति भएता पनि अमेरिकासँगको खटपटका कारण उक्त भवन उत्तर कोरियाले हालसम्म भत्काएो छैन ।