सामसुङको ग्यालेक्सी एस २१ सिरिज जनवरीमा

सोल – दक्षिण कोरियाली मोबाइल निर्माता कम्पनी सामसुङले सन् २०२१ को सुरुआतमा नै आफ्नो नयाँ स्मार्टफोन ग्यालेक्सी एस २१ सिरिज सार्वजनिक गर्ने तयारी गरेको छ ।

जनवरी महिनामा सार्वजनिक हुने एस २१ सिरिजमध्ये ग्यालेक्सी एस २१ अल्ट्रा स्मार्टफोन कस्तो हुनेछ भन्ने बारेमा केही तथ्यहरु लिक भैसकेका छन् ।

सार्वजनिक भएका समाचारहरु अनुसार ग्यालेक्सी एस २१ अल्ट्रामा १०८ मेगापिक्सेलको मुख्य क्यामरा हुनेछ भने सेल्फी क्यामरा ४० मेगापिक्सेलको हुनेछ । एन्ड्रोइड ११ बाट चल्ने एस २१ अल्ट्रामा ६.८ इन्चको डाइनामिक एमोलेड डिस्प्ले रहनेछ ।

त्यस्तै गरि सामसुङले आफ्नो आगामी फ्लागसिप स्मार्टफोनसँग चार्जर तथा इयरफोन नदिने योजना बनाएको छ ।

समाचार अनुसार सामसुङको नयाँ स्मार्टफोन ग्यालेक्सी एस २१ सँग चार्जर तथा इयरफोन हुनेछैन । सामसुङको यो निर्णयले वातावरण प्रदूषण कम गर्न सहयोग मात्र गर्ने छैन स्मार्टफोनबाट हुने कम्पनीको मुनाफामा पनि वृद्धि गर्नेछ ।

दक्षिण कोरियाली मिडियाहरुका अनुसार सामसुङले केवल एस २१ सिरिजका ग्यालेक्स एस २१ प्लस तथा ग्यालेक्सी एस २१ अल्ट्रामा पनि चार्जर र इयरफोन दिनेछैन ।

यद्यपि सामसुङले खर्च कटौती तथा आम्दानी वृद्धिका लागि विभिन्न खाले उपायहरुको अबलम्बन गर्दै आएको छ । सामसुङका कतिपय स्मार्टफोनले ४५ वाटको फास्ट चार्जिङ सपोर्ट गर्दछन् । तर यस्ता स्मार्टफोनसँग पनि कम्पनीले २५ वाटकै चार्जर दिने गर्दछ । यस्तोमा प्रयोगकर्ताले फास्ट चार्जिङका लागि सामसुङको अर्को छुट्टै चार्जर खरिद गर्नुपर्ने हुन्छ ।