सामसुङले सार्वजनिक गर्यो ‘ग्यालेक्सी जेड फोल्ड -२’

सोल – सामसुङ इलेक्ट्रोनिक्सले आधिकारिक रुपमा आफ्नो नयाँ बहुआयामिक स्मार्ट फोन “ग्यालेक्सी जेड फोल्ड -२” सार्वजनिक गरेको छ ।

यो फोन सार्वजनिक भएसँगै सामसुङले फोल्डिङ फोन बजारमा आफ्नो बर्चस्व कायमै राख्ने कम्पनिले बताएको छ । कम्पनिले उक्त फोन सार्वजनिक गर्ने क्रममा यस फोनमा थपिएका नयाँ विशेषताहरु समेत सार्वजनिक गरेको छ ।

सामसुङ मोवाइलका सञ्चार विभाग प्रमुख रो ताई मुनले आफ्ना ग्राहकहरुका गुनासा तथा अपेक्षालाई सम्बोधन गरेर यो फोन सार्वजनिक गरिएको बताएका छन् । गत अगष्ट ५ मै सार्वजनिक गरिएको उक्त स्मार्टफोनका विशेषताहरु भने सार्वजनिक गरिएका थिएनन् ।

अमेरिका, दक्षिण कोरिया लगायतका ४० देशहरुबाट माग भइरहेको उक्त स्मार्टफोनको बजार मुल्य २०२४ अमेरिकी डलर तोकिएको छ । सेप्टेम्बर ११ बाट १५ सम्म प्रि बुकिङ गरिने कम्पनिले जनाएको छ ।

५-जी नेटवर्क भएको यो स्मार्टफोन ७.६ इञ्च मुख्य डिस्प्ले, तथा ६.२ इञ्च कभर डिस्प्ले सहित उपलव्ध हुने छ । मुख्य डिस्प्लेमा रहेको १२० हर्ज पावरले फोनलाई सहज तरिकाले चलाउन सहयोग गर्ने छ ।

‘अल्ट्रा थिन ग्लास’ को प्रयोग गरिएको यो स्मार्ट फोनमा १२ /१२ मेगापिक्सेलका सुटर, अल्ट्रा वाइड तथा टेलिफोटो क्यामरा जडित छन् । मुख्य तथा कभर डिस्प्लेमा १० मेगापिक्सेल क्यामरा जडान गरिएका छन् ।

१२ जिबि र्याम तथा २५६ जिवि मेमरि भएको यो फोनले मेमरि कार्ड भने सपोर्ट गर्ने छैन । यस फोनमा ४५०० एमएएचको ब्याट्रीको प्रयोग गरिएको छ ।

यस फोनमा प्रयोगकर्ताले भ्यु फाइन्डरको साहायतामा उच्च गुणस्तरको सेल्फि लिन सक्नेछन् । त्यस्तै प्रयोगकर्ताले एकै पटकमा ३ वटा एप्स प्रयोग गर्न सक्ने छन् । एउटै एपमा धेरै फाइल खोली प्रयोग गर्न सकिने यसकाे नयाँ विशेषता हो ।

प्रयोगकर्ताहरुको सुझावलाई उच्च मुल्याङ्कन गर्दै सोही अनुरुपका विशेषता फोनमा हालेको बताउदै कम्पनिले यो फोनको बजार राम्रो हुने बताएको छ । कम्पनिले यस बर्ष न्युनतम ५ लाख प्रति फोन विक्री हुने लक्ष राखेको छ ।