प्रभुकाे ‘प्रभु इजी फोरेक्स’ सुरू

काठमाडाैं -प्रभु बैङ्क लिमिटेडले ग्राहकको सुविधाका लागि अत्याधुनिक प्रविधियुक्त गुणस्तरीय बैङ्किङ सेवा उपलब्ध गराउने क्रममा वैदेशिक मुद्रा सटही सुविधा मोबाइलमार्फत अनलाइन आवेदन गर्न सकिने एप्लिकेसन ‘प्रभु इजी फोरेक्स’ सञ्चालनमा ल्याएको छ । 

रोजगारी, व्यवसाय, पर्यटन तथा अन्य प्रयोजनका लागि विदेश भ्रमण गर्नेको सङ्ख्या दिनानुदिन बढ्दै गइरहेको र व्यस्त दैनिकीका बावजुद बैङ्कसम्मै पुगेर वैदेशिक मुद्रा लिनुपर्ने बाध्यतालाई प्रविधिमैत्री तथा सरलीकृत गर्नका लागि प्रभु इजी फोरेक्स एप्लिकेसन अति नै उपयोगी हुने विश्वास बैङ्ककाे छ । 

प्रभु इजी फोरेक्स मोबाइल एप हाल गुगल प्लेस्टोरबाट सजिलै डाउनलोड गर्न सकिनेछ भने एपलको एपस्टोरमा समेत चाँडै उपलब्ध हुनेछ । मोबाइल एपबाट आवेदन दिने ग्राहकलाई बैङ्कबाट केही समयभित्रै एसएमएसमार्फत सटहीको कन्फर्मेसन प्रदान गरिने छ । त्यसपछि आवेदकले आफ्नो अनुकूल समयमा तोकिएको शाखा तथा काउन्टरबाट वैदेशिक मुद्रा सङ्कलन गर्न सक्नेछन् ।

त्रिभुवन अन्तर्राष्ट्रिय विमानस्थलस्थित बैङ्कको काउन्टरबाट समेत सहजै यो सुविधा उपलब्ध हुने व्यवस्था बैङ्कले गरेको छ । 

प्रभु बैङ्कले सञ्चालनमा ल्याएको यो मोबाइल एपबाट समयको बचत तथा बिना झन्झट अनलाइन गुणस्तरीय सेवा उपभोग गर्न सकिने भएकाले ग्राहकले यसबाट अधिकतम लाभ लिनेछन् भन्ने बैङ्कले विश्वास लिएको विज्ञप्तिमार्फत जनाएको छ ।