कोरियामा स्पाइ क्यामेराको प्रयोग गरी गोप्य भिडियो खिच्ने पक्राउ

सोल । दक्षिण कोरियाका होटलहरुमा सानो क्यामेरा जडान गरेर स्पाइ क्यामेरामार्फत मानिसहरुको संवेदनशील विषयको गोप्यरुपमा भिडियो खिच्ने चार जनालाई प्रहरीले बुधबार गिरफ्तार गरेको छ । उनीहरुले होटल रुममा रहेका १६०० जना मानिसको गोप्य विषयको भिडियो खिचेर एउटा वेबसाइटलाई बेच्दै आएको बताइएको छ ।

उनीहरुले टिभी, हेयर ड्रायर होल्डर, सकेट लगायतका स्थानमा मिनि क्यामेरा जोडेर यस्ता गतिविधि सञ्चालन गर्दै आएका थिए । दोषी सावित भएमा उनीहरुलाई १० वर्ष जेल सजाय तोकिनुका साथै २६ हजार ५ सय ७१ डलर जरिबाना तिराइनेछ ।

यौन र नग्नताको गोप्य ढंगले भिडियो खिच्ने कार्य दक्षिण कोरियामा बढ्दै गएकोले सर्बत्र आलोचना भइरहेको छ । यस्ता गतिविधि बढ्दै गएकाले केही समय अघि त्यहाँ महिलाहरुले विरोध प्रदर्शन समेत गरेका थिए ।

प्रहरीका अनुसार गएको अगष्ट महिनामा प्रहरीले १० वटा दक्षिण कोरियाली शहरका ३० वटा होटलमा १ एमएम लेन्सको क्यामरा जोडेर भिडियो खिचेको पाइएको थियो ।

पोर्नोग्राफीको उत्पादन र वितरण दक्षिण कोरियामा अवैध रहँदै आएको छ सन् २०१७ मा यस खालका ६ हजार मुद्दा दर्ता भएका थिए । यस्ता घटनामा संलग्न भएको आरोपमा प्रहरीले ५ हजार ४०० मानिसलाई पक्राउ गरेको छ । तर २ प्रतिशत भन्दा कम मात्रै जेल गएका छन् । ९बीबीसी०