सामसुङ एस ८ मार्च २९ मा सार्वजनिक हुने सम्भावना

काठमाडौँ – सामसुङले ग्यालेक्सी एस ८ मोबाइल फोन सन् २०१७ को मोबाइल वर्ल्ड कंग्रेसमा सार्वजनिक नगर्ने घोषणा गरेसँगै उक्त फोन मार्च २९ मा सार्वजनिक गरिने हल्ला चलेको छ। मोबाइल वर्ल्ड कंग्रेस फेब्रुअरी २९ देखि बार्सिलोनामा सुरु हुँदैछ।

२०१७ का लागि सामसुङको ‘फ्ल्यागशीप’ फोन मानिएको ग्यालेक्सी एस ८ लाई विश्वका थुप्रै सहरमा एकै पटक सार्वजनिक गरिने जनाइएको छ। यद्यपि अप्रिल महिनाको अन्त्यमा मात्रै त्यो फोन बजारमा उपलब्ध हुनेछ।

गत वर्ष सामसुङको ग्यालेक्सी नोट ७ को ब्याट्रीमा खराबी आएपछि व्यापारमा ठूलो क्षति बेहोरेको सामसुङका लागि यो नयाँ सुरुवातको मौका हुने बताइएको छ।

हालै सो कम्पनीले ग्यालेक्सी नोट ७ मा आगो लाग्नुको मुख्य कारण फोनको निर्माण हतारमा गरिनु भएको बताएको छ। हतारमा फोन निर्माण गरिँदा त्यसको गुणस्तरमा धक्का पुगेको कुरा सामसुङले सार्वजनिक गरेको हो |