विकास खर्च ३६% मात्रै

काठमाडौँ- चालू आर्थिक वर्षको ११ महिनामा सरकारले ३६.४९% मात्रै पुँजीगत खर्च गरेको छ । अर्थविद्का अनुसार कुल ३ खर्ब ७८ अर्ब ९ करोड बजेटमध्ये १ खर्ब ३७ अर्ब ९६ करोड मात्रै खर्च भएको र असार मसान्तसम्म लक्ष्य अनुसार पुँजीगत खर्च नहुने स्पष्ट रहेको छ ।

अर्थविद् ज्ञानेन्द्र अधिकारीले सरकारको खर्च गर्ने क्षमताले निराशा जगाएको बताएका छन् । उनले भने, “विकास बजेट समयमा खर्च नहुनु हाम्रो विडम्बना हो । यस्तो तालले विकासमा फड्को मार्न सकिँदैन।”

उसो त विकास बजेट खर्च गर्न नसक्नु नेपालको पुरानै रोग हो । मुलुक संघीयतामा गइसकेपछि यसमा सुधार हुने अपेक्षा थियो । तर, हुन सकेको छैन । सरकारले वैशाखसम्म ३१.२८, चैतसम्म २७.४५, फागुनसम्म २०.७३, माघसम्म १६.५२, पुससम्म १३.४४ प्रतिशत खर्च गरेको थियो। यस्तै मंसिरसम्म ७.६७, कात्तिकसम्म ५.५७, असोजसम्म ३.९४, भदौसम्म ०.६९ र साउनमा ०.२३ प्रतिशत पुँजीगत खर्च भएको महालेखा नियन्त्रक कार्यालयको तथ्यांक छ।