राष्ट्र बैंकको १७ औं गभर्नरमा खोटाङ्गका अधिकारी नियुक्त, अधिकारीको पृष्ठभूमी यस्तो छ

काठमाडौँ-सरकारले नेपाल राष्ट्र बैंकको  १७ औं  गभर्नरमा सिफारिस भएका तीन जना मध्ये महाप्रसाद अधिकारीलाई नियुक्त गरेको छ ।

आज बसेको मन्त्रिपरिषद् बैठकले सिफारिस समितिले छनौट गरेका तीन मध्येबाट अधिकारीलाई गभर्नरमा नियुक्त गर्ने गरेको हो ।

अर्थमन्त्री संयोजक रहेको सिफारिश समितिले हिजो अधिकारी, डेपुटी गभर्नर चिन्तामणि सिवाकोटी र पूर्व अर्थसचिव राजन खनालको नाम छनौट गरेको थियो |

निवर्तमान गभर्नर चिरञ्जीवी नेपाल यहि चैत ६ गतेदेखि अवकाश भएपछि रिक्त गभर्नरमा बरिष्ठ डेपुटी गभर्नर चिन्तामणि सिवाकोटीलाई कायम मुकायम मुकर्रर गरेको थियो ।

समितिमा अर्थमन्त्री खतिवडा संयोजक, पुर्व गभर्नर विजयनाथ भट्टराई र पूर्व सचिव कृष्णहरि बाँस्कोटा रहेका छन् |

पृष्ठभूमी

खोटांङमा जन्मिएका अधिकारीसंग वित्तीय क्षेत्रको नियामक निकाय राष्ट्र बैंकमा ३० वर्ष काम गरेको अनुभव छ | उनले राष्ट्र बैंकको सेकेन्ड म्यान अर्थात डेपुटी गभर्नर भएर काम गरिसकेका छन् । राष्ट बैंकको गभर्नरका लागि तत्कालीन अर्थमन्त्री डा. रामशरण महतले अधिकारीलाई पनि सिफारिस गरेका थिए ।

राष्ट्र बैंकमा रहँदा अधिकारीले सफलतापुर्वक आफ्नो जिम्मेवारी बहन गरेका थिए । अधिकारीले सन् १९९३ मा दि इन्डियन इन्टिच्यूट अफ चाटर्ड एकाउन्टेन्सिबाट चाटर्ड एकाउन्टेन्सीसम्मको अध्ययन पुरा गरिसकेका छन् ।