उपभाेक्ताले किन्न छाेडेपछि प्याजको मुल्य घट्दै

काठमाडौं – पछिल्लो समय बढ्दो क्रममा रहेको प्याजको भाउ शनिबार भने थोक मुल्यमा ३० रुपैयाँ घटेको छ । अघिल्लो दिन अर्थात शुक्रबार कालीमाटी फलफुल तरकारी बजारमा १८५ रुपैयाँ थोक मुल्यमा विक्रि भएको प्याजको मुल्य शनिबार १५५ रुपैयाँमा झरेको हो ।

थोक मुल्यमा प्रतिकेजी ३० रुपैयाँले प्याजको मुल्य घटेसँगै खुद्रा मुल्यमा पनि कमी आएको छ ।  यसअघि प्याजको खुद्रा मुल्य २३० देखि २५० रुपैयाँ प्रतिकेजी पुगेको थियो । शनिबार भने प्याजको खुद्रा मुल्य १९० रुपैँयामा कारोबार भएको कालीमाटी फलफुल तथा तरकारी विकास  समितिका कार्यकारी निर्देशक तेजेन्द्रप्रसाद पौडेलले बताए । 

प्याजको मुल्य बढेसँगै आम उपभोक्ताले किन्न छाडेका थिए भने व्यापारीले पनि विक्रि गर्न समेत छाडेका थिए । प्याजको मुल्य बढेसँगै उपभोक्ताले किन्ने कम गरेपछि मुल्य घटेको फलफुल तथा तरकारी विकास केन्द्रका प्रमुख भरतबहादुर आचार्यले जानकारी दिए ।

उनले भारतबाट आयात कम हुने वित्तिकै मुल्य बढ्नु स्वभाविक रहेको बताए । उनका अनुसार, प्याजको मुल्य अझ केही घट्न सक्ने सम्भावना छ । 

स्वदेशमा प्याजको उत्पादन बढाउनुपर्ने उनको तर्क छ । विगतमा सरकारले प्याजमा आत्मनिर्भर हुने भन्दै प्याज मिसन कार्यक्रम चलायो । ,तरपनि अपेक्षित रुपले उत्पादन बढाउन नसक्दा बर्षेनी भारतबाट आयात गर्नुपरेको सरकारी कर्मचारी नै बताउँछन् ।