दक्षिण कोरियाको ग्यांवोन प्रान्त र पोखरा महानगरबीच हरितगृह संचालन सम्झौता

काठमाडौं- पोखरा उपमहानगरपालिका र दक्षिण कोरियाको ग्यांवोन प्रान्तको हरित टेक्नोलोजी केन्द्र (जिटिसी)बीच पोखरामा हरितगृह सम्बन्धि परियोजना सञ्चालन गर्न सम्झौता भएको छ।

दक्षिण कोरियामा आयोजित विश्व कार्बन फोरम–२०१९ का अवसरमा पोखरा महानगरपालिकाका प्रमुख मानबहादुर जिसी र ग्यांवोन प्रान्तका तर्फबाट गभर्नर मुन सुन चोइ तथा हरित टेक्नोलोजी केन्द्रको तर्फबाट प्रमुख कार्यकारी निर्देशक क्युंग्ग नाम सिनले हस्ताक्षर गरेका हुन्।

सम्झौतापत्रमा पोखरा क्षेत्रमा हरियालीसहितको यातायात पूर्वाधार निर्माणको परियोजनालाई महत्व दिइएको पोखरा महानगरपालिकाका प्रमुख मानबहादुर जिसीको स्वकीय सचिवालयले जनाएको छ ।

समझदारी पत्रमा पोखरालाई स्मार्ट वातावरणमैत्री पर्यटन, स्मार्ट सहरका प्रविधिको प्रयोग, इ मोबिलिटी, वैज्ञानिक खोज, अध्ययन अनुसन्धान तथा पोखराको संस्थागत विकासका लागि कार्य गर्ने उल्लेख छ ।

हरित टेक्नोलोजी केन्द्रले यसअघि भुटान ,युगान्डा लगायतका देशमा गरेका परियोजनाहरु सफल छन् ।

सम्झौतापछि तीन वटै पक्षबीच विश्वमा बढिरहेको कार्बन उत्पादन र हरित गृह ग्यासको प्रभाव कम गराउन परियोजना अगाडि बढाउने प्रतिबद्धता समेत व्यक्त गरेका छन् ।

त्रिपक्षीय सम्झौता पछि बोल्दै पोखरा महानगरपालिकाका प्रमुख मानबहादुर जिसीले नेपालमा लगानी मैत्री वातावरण बनिसकेकाले ढुक्क भएर लगानी गर्न आग्रह गरे । उनले नेपाल हरित गृह ग्यासको उत्पादन कम गर्न प्रतिबद्ध रहेको बताए ।

यस परियोजना सफल भएपछि पोखराको यातायात गुरु योजना तयार भई कार्यान्वयनको चरणमा प्रवेश गर्ने छ ।