१/१ हजार जरिवाना तिरेर छुटे १ सय २२ चिनियाँ

काठमाडाैं-पुस ७ गते पक्राउ परेका १ सय २२ चिनियाँहरू १/१ हजार जरिवाना तिरेर छुटेका छन् । जिल्ला प्रशासन कार्यालय काठमाडौँले आइतवार जरिवाना तिराएर छोडेको हो ।

प्रहरीले अभद्र व्यवहारसम्बन्धी मुद्दामा अनुसन्धानको प्रतिवेदन जिल्ला सरकारी वकिल कार्यालयमा बुझाएको थियो । अभद्र व्यवहार बाहेक पक्राउ परेका चिनियाँहरूको अन्य कसूर भेटिएको थिएन ।

उनीहरूले कसूर स्वीकारेपछि जरिवाना तिराएर छाडेको जिल्ला प्रशासन कार्यालय काठमाडौँले जनाएको छ ।

प्रहरीले जरिवाना तिरेर रिहा भएका चिनियाँहरूलाई अध्यागमनमा बुझाउने तयारी गरेको छ । ‘उनीहरू रिहा भएपछि हामीले अध्यागमनलाई बुझाउने तयारी गरेका छौं,’ काठमाडौँ प्रहरी परिसरका एसएसपी उत्तमराज सुवेदीले  भने, ‘अध्यागमनले त्यही अनुसार कारवाही गर्नेछ ।’