सुजाताको हत्यारालाई बाल सुधार गृह पठाउने आदेश

पाँचथर, असार२९

हिलिहाङ–६, भारपाको सिटे जंगलमा भएको सुजाता तामाङको हत्यारालाई बाल सुधार गृह पठाउन अदालतले आदेश दिएको छ । हत्यामा संलग्न सोही स्थान बस्ने घनेन्द्र लाओती बालक भएकाले जिल्ला अदालत पाँचथरका न्याधिश मनोज के.सी.को इजलासले उनलाई बाल सुधार गृह पठाउन आदेश दिएको हो ।

हत्यामा संलग्न लाओतीले आफू १७ बर्ष मात्र पुगेको बयानको क्रममा बताएका थिए । उनको जन्मदर्ता प्रमाण–पत्र र उनले अध्ययन गरेको विद्यालयको प्रमाण–पत्र हेर्दा उनी १७ बर्ष सात महिना मात्र पुगेको देखिएको जिल्ला अदालतले जनाएको छ । बालबालिका सम्बन्धि ऐनको दफा २४ अनुसार उनलाई बाल सुधार गृह पठाउन अदालतले आदेश दिएको हो ।

निज लाओतीले इलाम माईजोगमाई–५, सोयाककी २१ बर्षिया तामाङको असार ३ गते जंगलबीचको बाटोमा घाटि रेटि हत्या गरेका थिए ।
तामाङ गोपेटारस्थित एनएमबी माइक्रोफाइनान्समा कार्यरत थिइन् । उक्त दिन उनी हिलिहाङ–६, मा माइक्रोफाइनान्सको दुई वटा समूहको बैठक सकेर कार्यालय फर्किरहेकी थिइन् ।

लाओतीले तामाङको हत्या गरी सुजाताको साथमा रहेको समूहका सदस्यबाट संकलित ८१ हजार सात सय रुपैंयाँ समेत लुटेका थिए ।