कोरियामा एकैचोटी १०० चुरोट पिउने पक्राउ

सोल – दक्षिण कोरिया स्थित उल्सान प्रहरीले एक ब्यक्तिलाई चुरोट पिएको आरोपमा पक्राउ गरेको छ ।

२० बर्ष माथिको उमेरका उनलाई एक पिसी क्याफेमा बसि करिव १०० वटा भन्दा बढी चुरोट एकैपटक पीएको भन्दै प्रहरीले पक्राउ गरेको हो ।

प्रहरीका अनुसार क्याफे सञ्चालकको उजुरी पश्चात उनलाई पक्राउ गरिएको हो । आफ्नो क्याफेको धुम्रपान गर्ने क्षेत्रमा एक्कासी धुँवाको मुस्लो देखेपछि आफू अवलोकन गर्न जाँदा उनले दुबै हातले चुरोट तानिरहेको देखेको सञ्चालकले बताएका छन् । उनले प्रायोजित रुपमा आफ्नो क्याफेमा आगलागी गराउन लागेको आशंकामा प्रहरीलाई खबर गरेको बताएका छन् ।

यता पक्राउ परेका ती ब्यक्तिले भने आफूले आफ्नो युट्युब च्यानलमा हाल्ने भिडियो कन्टेन्टका लागि चुरोट पिएको बताएका छन् । उनले ६/७ बट्टा चुरोट एकसाथ खोलेर पिउन थालेका थिए र उक्त कक्षबाट आगलागी जस्तै गरि धुँवा आइरहेको प्रहरीले बताएको छ ।

हाल उनी प्रहरी नियन्त्रणमा रहेको र उनी माथि अनुमति बिना अरुको सम्पत्ति उपयोग गरेको आरोपमा मुद्दा लगाइने प्रहरीले बताएको छ । दक्षिण कोरियामा ब्यवसायिक प्रयोजनका लागि अरुको सम्पत्ति प्रयोग गर्दा अनिवार्य खर्च तिर्नु पर्ने समेत प्रहरीले बताएको छ ।