बोयर जातका सय बाख्रा भित्राउदैँ चिचिला गाउँपालिका

सङ्खुवासभा – बाख्रा पालनका लागि पकेट क्षेत्र घोषणा गरेको चिचिला गाउँपालिकाले बोयर जातका एक सय वटा बाख्रा गाउँपालिका भित्राउने भएको छ । बाख्रा पालनबाट कृषकहरुको आय स्तर बृद्धि गराउने उद्देश्यका साथ ५० प्रतिशत अनुदानमा गाउँपालिकाले बाख्रा वितरण सुरु गरेको हो ।

बाख्रा पालनको लागि गाउँपालिकाले चालु आर्थिक बर्षमा २५ लाख रुपैयाँ विनियोजन गरेको थियो । उक्त बजेट र कृषकहरुबाट संकलन भएको ५० प्रतिशत रकमबाट बाख्रा खरिद गरिएको गाउँपालिका पशु विकास शाखा प्रमुख दिर्घमान कुलुङले जानकारी दिनुभयो । उक्त बजेटबाट नै औषधी उपचारका लागि पनि बजेट छुट्याईएको कुलुङको भनाई छ । हालसम्म दुई चरण गरि ७७ वटा बाख्रा ल्याएर वितरण गरिसकिएको शाखा प्रमुख कुलुङले जानकारी दिनुभयो । अब तेश्रो तथा अन्तिम चरणमा ३३ वटा बाख्रा ल्याउन तयारी भईरहेको उहाँले जानकारी दिनुभयो ।

पाठी ५० र बोका ७५ प्रतिशतको बोयर बाख्राको ढुवानी सहितको मुल्य ३२ हजार रुपैयाँ परेको कुलुङले जानकारी दिनुभयो । उहाँका अनुसार शत प्रतिशत बोयर जातका बोकाबाट अन्य जातका पाठीसँग क्रस भई जन्मिएको बाख्रामा ५० प्रतिशत बोयरको गुण हुन्छ । उक्त ५० प्रतिशतको पाठी र शत प्रतिशत बोयर जातको बोकाबाट जन्मिएको बाख्रामा ७५ प्रतिशत बोयरको गुण हुन्छ । उक्त बाख्रा मोरङको रंगेलीबाट ल्याईएको गाउँपालिकाले जनाएको छ ।

चिचिला गाउँपालिकाले पाँच वटै वडालाई बाख्रा पकेट क्षेत्र घोषणा गरेर कार्यक्रम सञ्चालन गर्न लागेको हो । वडा नम्बर १ मा सोभाङ्मा बाख्रा पालन समुह र नमुना बाख्रा पालन समुह, वडा नम्बर २ मा रमिते बाख्रा पालन समुह र आहाले बाख्रा पालन समुह गठन गरिएको छ । त्यस्तै, वडा नम्बर ३ मा नमुना बाख्रा पालन समुह गठन गरिएको छ । वडा नम्बर ४ मा बलुथाम बाख्रा पालन समुह, सरस्वती बाख्रा पालिन कृषक समुह र मत्स्यपोखरी बाख्रा पालन समुह गरि ३ वटा समुह बनाईएको छ । वडा नम्बर ५ मा प्रगति बाख्रा पालन समुह र बाक्सिदा बाख्रा पालिन समुह गठन गरिएको गाउँपालिकाले जनाएको छ ।

चिचिला गाउँपालिकामा बाख्रा पालनका लागि उपयुक्त वातावरण र भुगोल रहेकोले राम्रो आमदामी हुने गाउँपालिका अध्यक्ष पासाङ नुर्वु शेर्पाको दावी छ । बाख्रा पालन समुहमा आवद्ध सदस्यहरु पहिलेदेखि नै बाख्रा पाल्दै आएको र बोयर जातको बोकाबाट उन्नत जातको बाख्रा उत्पादन हुने भएकोले पनि कृषकहरुले आयस्तर बृद्धि हुने अपेक्षा रहेको अध्यक्ष शेर्पाले बताउनुभयो । पकेट कार्यक्रममा एक सय कृषक आवद्ध रहेकोमा अनुदानका बाहेक हजार भन्दा बढी बाख्रा रहेको अध्यक्ष शेर्पाले जानकारी दिनुभयो ।