दूध नबिक्दा कृषक चिन्तित

जाजरकोट – उत्पादित दूधले बजार नपाउँदा यहाँका कृषक चिन्तित छन् । उत्पादनले बजार नपाउँदा यस व्यवसायमा लागेका युवा निराश हुन थालेका हुन् ।
भेरी नगरपालिका–२, राङ्सीका मक्कर नेपाली उत्पादित दूधले बजार नपाएको बताउनुभयो । उहाँले दूध बिक्री नभए पनि यसबाट अन्य परिकार बनाउने सीप ज्ञान नहुँदा भैँसीपालन व्यवसाय छोड्ने सोचाइमा पुगेको बताउनुभयो । एक वर्षअघि दुग्ध व्यवसाय प्रवद्र्धन कार्यक्रमअन्तर्गत सुरु गरेको भैँसीपालनबाट उहाँले दैनिक २० लिटर उत्पादन गर्दै आउनुभएको छ तर सदरमुकाम खलङ्गा टाढा रहेको र नजिकका बजारमा खपत नहँुदा दूध खेर जाने गरेको नेपालीले बताउनुभयो । घिउ बनाउँदा पनि निकै घाटा लाग्ने उहाँको भनाइ छ ।
भेरी नगरपालिका–१, कालेगाउँका तुलसी बस्नेत पनि दूधले बजार नपाउँदा व्यवसाय नै छोड्नुपर्ने अवस्था आएको बताउनुभयो । उहाँले दैनिक दूध उत्पादन भए पनि बजारीकरणका लागि कसैले पहल नगरेको गुनासो गर्नुभयो ।
सोही गाउँका इन्द्रबहादुर बटाला पनि दूधले बजार नपाउँदा सबैको घरघरमा गएर बिक्री गर्न बाध्य भएको बताउनुहुन्छ । सरकारले भैँसीपालन व्यवसायका लागि अनुदानको व्यवस्था गरे पनि बजार व्यवस्थापनमा ध्यान नदिँदा आफूजस्ता व्यावसायिक किसान मर्कामा परेको बटालाको भनाइ छध्र
पशु अस्पताल तथा पशु विकास कार्यालय जाजरकोटका प्रमुख जरबहादुर भक्रीले कृषकको दूध खपतका लागि डेरीको व्यवस्था गर्न लागिएको बताउनुभयो । डेरीका लागि कस्तुरी सहकारी संस्थालाई कार्यक्रम स्वीकृत भइसकेकाले छिट्टै सञ्चालनमा आउने र कृषकले उत्पादन गरेको दूध त्यहाँ खपत गरिने जानकारी दिनुभयो ।